Almatyda QazNettiń quqyqtyq rettelý máseleleri talqylandy
ALMATY. Qazannyń 18-i. QazAqparat /Erbol Azanbek/ - Búgin Almatyda «QazNettiń quqyqtyq rettelýi jáne onyń qazaqtildi ınternet BAQ-tyń damýyna yqpaly» atty semınar ótti.
Sharany «Minber» jýrnalısterdi qoldaý ortalyǵy Soǵys jáne beıbitshilik týraly aqparat taratý jónindegi ınstıtýtymen (IWPR) jáne EQYU-nyń Astanadaǵy ókildigimen birige otyryp ótkizdi. Semınar barysynda «Qazaq gazetterin holdıngtendirý: paıdasy men zııany», «Qazirgi zańnamadaǵy erekshelikter», «QazNettiń medınaryqtaǵy orny: negizgi máseleler», «Medıanaryqtaǵy quqyqtyq saýatsyzdyqtyń saldary» máseleleri talqylandy.
Bul taqyryptar boıynsha QR Parlamenti Májilisiniń depýtaty Murat Ábenov, «Minber» jýrnalısterdi qoldaý ortalyǵynyń prezıdenti Esengúl Kápqyzy, Abaı. kz saıtynyń redaktory Dáýren Qýat, «Minber» jýrnalısterdi qoldaý ortalyǵynyń atqarýshy dırektory Ashat Erkimbaı, «Ádil sóz» halyqaralyq sóz bostandyǵyn qorǵaý ortalyǵynyń sot saraptama ortalyǵynyń jetekshisi Ǵalııa Ájenova qatysyp, baıandama jasady. Internetti retteýge qatysty qazirgi zańnamalyq aktilerge sholý jasalyp, jýrnalısterdiń quqyqtyq saýattylyǵyn arttyrý joldary boıynsha keńester aıtyldy. Sonymen qatar ózge elderde qoǵamdaǵy áleýmettik máselelerdi sheshýde jańa medıany qural retinde paıdalaný joldary túsindiriledi.
«Internetten qazaq tilinde málimet izdeý kún ótken saıyn artyp kele jatqandyqtan, ınternettiń quqyqtyq aspektisin durys túsiný ózektiligi artýda. Osy oraıda ınternetke qazaq tilinde jazbalar, vıdeo men sýretter t.b. qazaqtildi mazmunǵa toly málimetter engizetin ınternet qoldanýshylarǵa zań normasynyń jete túsindirilmeýi ári qaraı ınternet jobalaryn damytýǵa kedergi keltirýde. Osyndaı semınarǵa úkimet ókilderimen qatar, ınternette qazaq tilinde jobalardy jasap júrgen eriktilerdi shaqyrý arqyly biz Qazaq Internetiniń saýatty damýyna úles qosa alamyz», - deıdi «Minber» jýrnalısterdi qoldaý ortalyǵynyń tóraıymy E.Kápqyzy.
