Almatyda "KAZGOR" jobalaý akademııasynyń 80 jyldyǵyna arnalǵan merekelik kesh boldy

Qazaq jerindegi qurylys-jobalaý isiniń tuńǵysh ujymy sanalatyn akademııanyń mereıtoılyq keshine ardagerler, ár jyldary jumys istegen mamandar, búginde qyzmet jasap júrgen sáýletshiler men olardyń áriptesteri qatysty. Kesh baı tarıhy bar bul uıym týraly túsirilgen derekti fılmmen bastaldy.

"Men uzaq jyldar osynda jumys istedim. Bizdi uıymnyń kadrlardy saqtap, ár jumysyn joǵary dárejede iske asyryp, óz bedelin joǵaltpaı kele jatqandyǵy qýantady. Bul oraıda ınstıtýttyń basshylyǵyna der kezinde kelgen Ábdisaǵıt Táttiǵulovtyń eńbegin aıtqym keledi. Ol qıyn kezderi ınstıtýtty joǵary talap deńgeıine kótere bildi. 70-shi jyldardyń sońynda salynǵan Mádenıet saraıy, Ortalyq memlekettik murajaı, Ofıtserler úıi, "Alataý" shıpajaıy, "Qazaqstan" qonaqúıi syndy keshender men nysandardyń jobalanyp turǵyzylýy eldiń qurylys ındýstrııasynyń damýyna qosylǵan zor úles retinde áli kúnge deıin óz baǵasyn joǵaltqan joq. Qazirdiń ózinde de qalalarymyzdyń kelbetin ajarlandyra túsetin iri jobalar jasalýda. Bul oraıda Almatydaǵy "Nurly taý" ortalyǵyn, Astanadaǵy "Nursaıa", "Trıýmfalnyı" keshenderin, "2500 oryndyq kınokontsert zalyn" jáne taǵy da basqa jobalardy atasaq ta jetkilikti", dedi kóp jyldar "KAZGOR" jobalaý akademııasynda qyzmet jasaǵan sáýletshi Albına Petrova. Onyń aıtýynsha, akademııany qurylys salasynyń jetekshisi, turǵyn-azamattyq qurylystaǵy jobalaý isiniń kóshbasshysy dep aıtýǵa bolady.

Ashylý saltanatynda sóz sóılegen "KAZGOR" jobalaý akademııasynyń prezıdenti Ábdisaǵıt Táttiǵulov: «Akademııa bul kúnge qarqyndy eńbekpen, shyǵarmashylyq jetistiktermen jetti. Biz kóptegen jobalaýshylar býyndarynyń oń dástúrin jalǵastyryp kelemiz. Akademııa alǵashqy bop zerttelmegen tyń baǵyt - baǵa belgileý jumysyn qolǵa aldy jáne bul úderisti áli de jetildirip jatyrmyz. Ol qujattardyń barlyǵy memlekettik tilge aýdarylyp, basylyp shyqty, onyń elektrondyq bazasy da jasaldy. Búginde akademııa qalanyń bas jospary men azamattyq jáne ónerkásiptik mańyzy bar obektilerdi jobalaýmen aınalysýda. Akademııa HHІ-shi ǵasyrdyń birinshi on jyldyǵynda elimizdiń qurylys salasyn reformalaýǵa óz úlesin qosty. Bizdiń endigi ustanymyz ben mindetimiz - qazirgi zamannyń synynan múdirmeı ótý úshin árqashan ósip otyrý, barlyq kezde progrestiń aldyńǵy shebinde bolý», dedi ol.

Jıyn barysynda uıymnyń eń úzdik qyzmetkerleri qala ákiminiń qurmet gramotalarymen marapattalyp, olarǵa "QR qurmetti sáýletshisi" jáne "QR qurmetti qurylysshysy" tósbelgileri tabystaldy.