Almatyda qazan aıynyń 1-nen bastap qala tazalyǵyn saqtamaǵandarǵa aıyppul salynatyn bolady - Marat Kesekbaev
ALMATY. Qyrkúıektiń 29-y. QazAqparat /Názıra Eleýhan/ - Búgin Almatyda «Taza qala» aktsııasynyń qorytyndysy jarııalandy.
Esterińizge sala ketsek, bul shara qalalyq Tabıǵı resýrstar jáne tabıǵatty paıdalanýdy retteý basqarmasynyń uıymdastyrýymen qyrkúıek aıynyń 1-de bastaldy. Onyń maqsaty - úlken megapolıs sanalatyn Almaty qalasynyń tazalyǵyn saqtaý, qalanyń kórkine tıtteı de nuqsan keltirgenderdi áshkereleý. Aktsııada qala tazalyǵyn saqtamaǵandar, ınfraqurylymǵa zııan keltirgender, jol qozǵalysyna qolbaılaý jasap, qoqystardy tókken ne laqtyrǵandar ákimshilik jazaǵa tartylatyndyǵy habardar etildi.
"Shara barysynda qalanyń barlyq aýdandarynda reıdter ótti. 249 adam QR Kodeksiniń 387 baby boıynsha ákimshilik jaýapqa tartyldy, onyń ishinde 188 adamǵa eskertý jasaldy. 61 adam jalpy quny 407 669 teńge bolatyn aıyppul tóledi. Bir aı boıy BAQ quraldary arqyly da, reıd barysynda da barlyǵyna eskertý jasaldy, endi qazan aıynyń birinen bastap qatań sharalar qoldanylyp, aıyppul salynatyn bolady. Jeke tulǵalarǵa jıyrma aılyq esepteý kóleminde, jeke kásipker nemese zańdy tulǵalarǵa, kishi jáne orta bıznes sýbektileri men kommertsııalyq emes qurylymdarǵa jıyrmadan qyryqqa deıin, al iri kásipkerliktiń jeke tulǵasy bolsa elýden júzge deıingi kólemde aıyppul salynatyn bolady", dedi Tabıǵı resýrstar jáne tabıǵatty paıdalanýdy retteý basqarmasy bastyǵynyń orynbasary Marat Kesekbaev.
Onyń aıtýynsha, bul máseleni qoǵam bolyp sheshý kerek. "Ár adam qalanyń tazalyǵyna atsalyssa, shynymen de ásem qalamyz "taza qalaǵa" aınalady", dep atap ótti ol. «Tazalyqqa baýlýdy balabaqshadan, mektep qabyrǵasynan, úıdegi tárbıeden bastaý qajet».
Almaty qalasynyń ІІD-niń jol polıtsııa basqarmasy bastyǵynyń orynbasary Muqan Dosymbaevtiń sózine qaraǵanda, reıd barysynda 471 adamǵa ákimshilik shara qoldanylyp, nátıjesinde 2 mıllıon 477 myń 154 teńge aıyppul tólengen. "Onyń 1 mıllıon 842 842 teńgesi óndirilip alyndy", dedi ol.
