Almatyda qazaqtyń kórnekti teatr jáne kıno akteri Tańat Jaılybekovti eske alý keshi ótedi

      dep habarlaıdy QazAqparat.

         Ol 1929 jyly Almaty oblysynyń Jambyl aýdanyndaǵy Birlik aýylynda dúnıege kelip, 1989 jyly maýsymnyń 27-si kúni 60 jasynda ómirden ozǵan. Almatydaǵy №18 mektep-ınternatta tálim alǵan jas óren eńbek jolyn Sháken Aımanovtyń sebepker bolýymen 1944 jyly 15 jasynda  teatrdan bastaıdy. 1954  jyly Máskeýdegi Lýnacharskıı atyndaǵy memlekettik teatr ınstıtýtynyń akterlik fakýltetin bitirip, qutty shańyraǵyna  qaıta oralǵan óner sheberi ómiriniń sońyna deıin osynda jumys jasady. Alǵashqy rólin M. Gorkııdiń "Toǵysharlar" dramasyndaǵy Perchıhınnen bastaǵan akter 35 jyldyq eńbek jolynda teatr sahnasynda  70-ten astam keıipkerdi somdady.  Muhtar Áýezovtiń "Eńlik-Kebeginde"  Japal, "Qaraqypshaq Qobylandysynda"  Birsimbaı, "Aıman-Sholpanynda"  Qortyq, "Abaıynda"  Kókbaı, Sábıt Muqanovtyń "Shoqan Ýálıhanovynda" Jaınaq, Maltabar, Ǵabıt Músirepovtiń "Aqan seri-Aqtoqtysynda" Qońqaı, Ábdilda Tájibaevtyń "Maırasynda" Ýálı, Ábdijámil Nurpeıisovtiń "Qan men terinde" Sýdyr Ahmet sııaqty   taǵy basqa da kóptegen  rólderi úshin onyń esimi sahna óneriniń  shejiresinde altyn áriptermen  jazylyp qaldy.

         T. Jaılybekov kıno ónerinde de óshpes izin qaldyrdy. «Mosfılm» kınostýdııasynyń "Ana men gúlde" stansy bastyǵy, "Qanatty syılyqta" pıoner jetekshisi,  "Soldat Ivan Borvkın", "Ivan Brovkın tyń jerde" fılmderinde  Abaevty oınady.  "Qazaqfılm" kınostýdııasynyń  "Bizdiń súıikti dáriger", "Aldar kóse", "Abaı", "Aqyn armany", "Ólmestiń oralýy", "Aǵama arnalǵan qalyńdyq" pen  basqa da  kórkem fılmderde jáne birqatar telefılmderde árqıly beınedegi keıipkerlerdi jasady. Sondaı-aq kóptegen kórkem fılmderdiń qazaq tilinde de sóıleýine úlken úles qosyp, dýblıaj salasynda da ónimdi jumys jasady. Eren eńbegi eskerýsiz qalmaı  1958 jyly Qazaq óneriniń Máskeýdegi onkúndiginde "Qurmet belgisi" ordenimen marapattalyp, 1966 jyly Qazaq KSR eńbek sińirgen ártisi ataǵyna ıe boldy.