Almatyda qazaqtyń kóne jyryna arnalǵan anımatsııalyq fılmniń tusaýkeseri ótti
ALMATY. Mamyrdyń 29-y. QazAqparat /Názıra Eleýhan/ - Qazaq ertegileri - dúnıejúzindegi taqyryby eń baı ertegi. Qazaqta 6 tom ertegi bar. Sondyqtan eshqandaı stsenarıı jazýdyń qajeti joq, sony kitaptyń eń birinshi betinen bastap túsire bersek, keremet úlken qazynamyz bolar edi.
Biz osyǵan mán bermeımiz, dedi Almatyda Halyqaralyq balalardy qorǵaý kúnine oraı, "Iskra" kınoteatrynda ótken "Muńlyq-Zarlyq" atty anımatsııalyq fılmniń tusaýkeseri barysynda qazaqtyń belgili jazýshysy, dramatýrg, Memlekettik syılyqtyń laýreaty Dýlat Isabekov, dep habarlaıdy QazAqparat.
Onyń aıtýynsha, ónerdiń eń úlkeni balalarǵa arnalǵan osyndaı sheshire, osyndaı jyrlar men mýltfılmder. "Búgin sol olqylyqtardyń ornyn toltyrýdyń alǵashqy qadamy jasaldy", dep atap ótti ol.
Ol sonymen qatar, "Muńlyq-Zarlyqqa" arnalyp Arys qalasynda monýment qoıyldy, ol búginde qalanyń rámizine aınaldy. Endi ol zırattyń basyna kesene ornatý josparymyzda bar. Bizdiń jerimizde jyrǵa arqaý bolǵan eki mola bar biri - Syrdarııa jeriniń Jıdeli degen jerinde ornalasqan osy "Muńlyq-Zarlyq" zıraty bolsa, ekinshisi Aıagózdegi "Qozy Kórpesh-Baıan sulý" kesenesi. Sonymen qatar, búginde "Muńlyq-Zarlyq" pesasy jazyldy, ol kóptegen teatrlarda, Qyzylorda, Shymkent jáne taǵy da basqa qalalarda júrip jatyr. Maǵan osy mýltfılmniń stsenarıin jazyp berýdi ótindi. Ol osy mýltfılmge arnalǵan baıqaýda birinshi orynǵa ıe boldy. Eńbektiń baǵasyn kórermen sizder berersizder", dedi tanystyrylym barysynda Dýlat Isabekov.
Mádenıet qaıratkeri Batyrhan Dáýrenbekovtyń aıtýynsha, mýltfılm QR Baılanys jáne aqparat mınıstrligi men Ońtústik Qazaqstan oblysy ákimdiginiń tapsyrysy boıynsha túsirilgen. "Bul mýltfılmdi biz eki jyl daıyndadyq. Almatydan keıin Astana men Qaraǵandy qalasynda tanystyrylymyn ótkizýdi josparlap otyrmyz. Mýltfılm barlyq jasqa arnalǵan. Kezinde Pýshkın «Saltan patsha týraly jyr» atty ertegi jazǵan, bul mýlfılm sol erteginiń mazmunyna uqsaıdy. Búginde teledıdar, onyń ishinde mynaý móltek fılmder ósip kele jatqan jas urpaqty tárbıeleýde úlken ıdeologııalyq kúshti qarý bolyp otyr. Biz sondyqtan osyndaı mýltfılm arqyly ózimizdiń salt-dástúrimizdi dáriptep, tarıhymyzdy tanytyp, balalardy otansúıgishtikke, eliniń patrıot azamaty bolýyna shaqyrǵymyz keledi ", dep atap ótti ol.
Halyq aýyz ádebıetiniń jaýharyna aınalǵan "Muńlyq-Zarlyq" ańyzyn otandyq "Saq" kınostýdııasy túsirgen. Mýltfılmniń kólemi 20 mınýt. Rejısseri mádenıet qaıratkeri - Batyrhan Dáýrenbekov. Birinshi mýltıplıkatsııalyq fılmdi balalar úıinde tárbıelenýshi búldirshinder men jasóspirimder tamashalady. Kórsetilim sońynda barlyq balalarǵa syılyqtar tabystaldy.
