Almatyda «Qazaqtildi BAQ tájirıbesine jańa medıatehnologııalardy engizý» atty semınar-trenıng ótip jatyr

dep habarlaıdy QazAqparat.

Shara EQYU-nyń Astanadaǵy ókildigi men Soros Qazaqstan qorynyń qoldaýymen «Minber» jýrnalısterdi qoldaý ortalyǵynyń uıymdastyrýymen ótýde. Semınarǵa Qazaqstannyń barlyq oblystarynan 30-dan astam jýrnalıst qatysýda. Shara barysynda olarǵa jańa medıa-tehnologııalarmen jumys isteý, ınternet saıttar, blogtar ashý, ınternette vıdeo, aýdıo faıldar ornatý tásilderi úıretilmek.

2009 jyldan beri ınternet-resýrstar BAQ-ymen teńestirilgeni belgili. Buǵan sáıkes kez-kelgen blog ıesi, forým men chatqa qatysýshy BAQ ókilimen birdeı jaýapkershilikke ıe. Osyǵan oraı semınar barysynda BAQ ókilderine «Ádil sóz» halyqaralyq sóz bostandyǵyn qorǵaý qory men Ulttyq teleradıohabarlar taratý qaýymdastyǵynyń zańgerleriniń qatysýymen arnaıy quqyqtyq keńester berilip, ınternette maqalalar men aqparatty qalaı jazý tásilderi túsindiriledi. «Minber» jýrnalısterdi qoldaý ortalyǵy ókilderiniń aıtýynsha, semınardy uıymdastyrýdaǵy basty maqsat jańa medıatehnologııalardy qazaq tildi aqparat quraldarynyń tájirıbesine engizý.

«Internet resýrstarǵa qol jetkizý múmkindiginiń tómendigi qazaq tildi BAQ-nyń damýyna keri áserin tıgizip otyr. Sondyqtan qazaq tildi BAQ ókilderine jańa tehnologııalardy paıdalaný ádisterin úıretý kezek kúttirmeıtin is. Jańa tehnologııalardy úırený arqyly jýrnalıster kásibı biliktiligin arttyrýǵa múmkindik alady. Bul jýrnalıster arasynda ózara qarym-qatnastyń damýyna jáne QazNettiń memlekettik tilde damýyna óz áserin tıgizedi», deıdi «Minber» ortalyǵynyń ókilderi.

Semınarǵa qatysýshylardyń aıtýynsha, shara qazaq tildi BAQ ókilderi úshin óte mańyzdy. «Aldaǵy ýaqytta bul semınar jalǵasyn tabýy tıis. Óıtkeni qazaq tildi BAQ ókilderine jańa tehnologııalardy úıretý óte mańyzdy», deıdi qatysýshylar.