Almatyda “Qazaqtelekom” AQ-nyń demonstratsııalyq «iD-Center» zal qyzmeti ashyldy

dep habarlaıdy QazAqparat.

Qala ákimi ortalyqty aralap, jańa telekommýnıkatsııalyq qyzmet túrlerimen tanysty.

Atalmysh «iD-Center» bes fýnktsıonaldyq saralanymǵa bólingen - "Aqyldy úı", "Intellektýaldy ofıs", «Internet-kafe», «Medıa-stena» jáne «Konferents-zal». "Aqyldy úı" kelýshilerdi «Triple play» tujyrymdamasy boıynsha qyzmettermen tanystyrady. Ol degenimiz, úıde paıdalanýshylarǵa bir telefon jelisi boıynsha keńjolaqty arna negizinde telefon qyzmetin usyný, joǵary jyldamdyqta Internet jelisine qosylý jáne iD TV sandyq televıdenıe qyzmetterin usyný. Al, Internet-kafede Wi-Fi tehnologııasy boıynsha Internet jelisine symsyz qatynaý qyzmetimen tanysýǵa jáne paıdalanýǵa bolady", dedi «Almatytelekom» QTO-nyń kommertsııalyq dırektordyń orynbasary Bahtııar Oshýrbaev. Ol sonymen qatar, "zaldyń ortasynda baspasóz máslıhattar, iskerlik kezdesýler jáne kelissózderge arnalǵan eki konferents-zaly bar", dep atap ótti.

Almatydaǵy «iD-Center» - bul osydan bir jyl buryn ashylǵan, Astanadaǵy «Show Room» demonstratsııalyq zalynan keıingi kompanııanyń ekinshi iri jobasy. Osy syndy demonstratsııalyq alańdar Qaraǵandy, Shymkent jáne Atyraý oblysy ortalyqtarynda bar.

Demonstratsııalyq zal qyzmeti - bul búgingi zamanǵy ınfokommýnıkatsııalyq tehnologııalardyń áleýmettik-tanymdyq ortalyǵy. Kelýshiler bul jerden tolyq aqparat pen sarapshylardyń keńesin tegin ala alady.

Ortalyq aptanyń alty kúninde, tańerteńgi toǵyzdan, keshki altyǵa deıin jumys isteıtin bolady.