Almatyda qazaqtar quryltaıy ótedi

LMATY. Sáýirdiń 19-y. QazAqparat /Názıra Eleýhan/ - Almatyda sáýir aıynyń 24-i men 25-i aralyǵynda qazaqtar quryltaıy ótedi. Bul týraly búgin Almatyda ótken arnaıy baspasóz máslıhatynda aıtyldy, dep habarlaıdy QazAqparat.

Onda álemdik máseleler emes, elimizdiń ishindegi saıası-ekonomıkalyq máseleler, ulttyq, mádenı, rýhanı, ulttyq qundylyqtardy jańǵyrtý, jastar máseleleri talqylanatyn bolady.

"Quryltaıǵa ulttyq baǵytta jumys istep júrgen qoǵamdyq uıymdar, 130-daı adam shaqyryldy. Negizinen eki másele qaralady: Ne isteý kerek? jáne qalaı isteý kerek?, ıaǵnı, strategııa jáne taktıka. Sondaı-aq, bul máseleni sheshýde "Qazaqstanda turatyn barlyq ult arasyndaǵy teńdikti saqtaı otyra, ulttyq máseleni qalaı sheshemiz?», degen suraq bul sharanyń basty saýaly bolmaq. Bul quryltaı qazaqtardyń basyn qosyp, osy máselelerdi talqylaý úshin uıymdastyrylyp otyr. Meniń oıymsha, mundaı quryltaı qazaqtyń máselesi sheshilgenge deıin jylda bolyp turý kerek", dedi uıymdastyrý komıtetiniń múshesi Bolat Dúısembi.

Atalmysh sharaǵa memlekettik organdardyń ókilderi, barlyq saıası partııalar, qoǵamdyq uıymdar shaqyrylǵan. Sondaı-aq, elimizdiń barlyq aımaǵynan delegattar keledi dep kútilýde. Uıymdastyrýshylardyń aıtýynsha, bul sharany ótkizý týraly sheshim 2009 jyly qyrkúıek aıynyń 20-da qabyldanǵan.