Almatyda qazaqtan shyqqan tuńǵysh elshi Názir Tórequlov jaıynda túsirilgen derekti fılmniń tanystyrylymy boldy
ALMATY. 11 qańtar. QazAqparat /Názıra Eleýhan/ - Almatydaǵy «Iskra» kınoteatrynda rejısser Bolat Sháripovtyń «Ókiletti elshi» atty derekti fılminiń tusaýy kesilip, jurt nazaryna usynyldy.
Derekti fılm qazaqtan shyqqan tuńǵysh kásibı elshi Názir Tórequlov jaıynda túsirilgen. Fılmde elshiniń Keńes Odaǵy kezinde sińirgen eńbegi, Islam álemindegi alǵashqy elshi retindegi róli aıtylady. Sondaı-aq Stalınniń, kishi elderge júrgizilgen Keńes Odaǵynyń solaqaı saıasaty baıandalady.
«Fılmdi túsirýge 9-10 aıdaı ýaqyt ketti. Materıaldar tabýda qıyndyqtar da boldy. Ózimizdiń, Reseıdiń muraǵattyq materıaldaryn paıdalandyq, sonymen qatar túrli derekterdi Taır Mansurovtyń Názir Tórequlov jaıynda jazǵan kitabynan aldyq. Týyndynyń stsenarııin ózim jazdym. Bul fılmdi túsirýdegi maqsat - halqymyzdyń uly perzenti, qazaqtyń nar azamaty, memlekettik qaıratker, dıplomat, ókinishke oraı, kezinde eleýsiz qalǵan tulǵanyń atyn, esimin keleshek urpaqqa, jastarǵa jetkizý bolyp tabylady», - dedi atalmysh fılmniń rejısseri Bolat Sháripov.
Ol sonymen qatar: «elshi qyzmet etken Arab Ámirliginen biz bilmeıtin derekter tabylsa, derekti fılm tolyǵa túser edi», - dep atap ótti.
Sh.Aımanov atyndaǵy «Qazaqfılm» kınostýdııasynyń bas redaktory Dıdar Amantaıdyń aıtýynsha, atalmysh derekti fılm Mádenıet mınıstrliginiń tapsyrysy boıynsha túsirilgen.
Onyń sózine qaraǵanda, «Qazaqfılm» kınostýdııasy 2009 jyly 30 tarta derekti fılmdi óndiriske jiberse, 2010 jyly 40-tan astam derekti fılm jasap shyǵarǵan. «Onyń ishinde Baýyrjan Momyshuly, Rymǵalı Nurǵalıev, Bıbigúl Tólegenova, Muhtar Maǵaýın, Ábish Kekilbaev, «Qorqyt» týraly derekti fılmder bar. Bul fılmderdiń barlyǵy daıyn bolyp, dıskige jazyldy. Ótken jyly óndiriske jiberilgen Shámshi Qaldaıaqov pen Mirjaqyp Dýlatov jaıyndaǵy fılmder aıaqtalýǵa jaqyn. Al, bıylǵy jyly Kenesary Qasymov, Ázirbaıjan Mámbetov týraly, «Ashtyq» týraly fılmderdi jasaýdy josparlap otyrmyz. Aldaǵy ýaqytta da qazaq álemine úlken eńbek sińirgen, birtýar azamattarymyz, aǵalarymyz jaıynda fılmderdi túsirýdi odan ári jalǵastyra beremiz»,- dep atap ótti ol.
Kınostýdııadan shyqqan barlyq derekti fılder dısk túrinde shyǵarylyp, telearnalarmen kelisimge otyrǵandyqtan turaqty túrde kórsetilip turatyn bolady.
