Almatyda «Qazaqstannyń táýelsizdigi jáne rýhanı-mádenı qundylyqtar» atty konferentsııa ótýde
Konferentsııaǵa elimizdegi jáne basqa da alys-jaqyn shetelderden belgili qoǵam jáne memleket qaıratkerleri, tanymal ǵalymdar, kórnekti qalamgerler, mádenıet pen óner salasynyń maıtalmandary, AQSh, Túrkııa, Koreıa, Ózbekstan, Qyrǵyzstan, Ázerbaıjan, Reseı jáne taǵy basqa elderdiń jáne respýblıkanyń jetekshi oqý oryndary, ǵylymı-zertteý ortalyqtarynyń basshylary men ǵalymdary, ýnıversıtettiń oqytýshy-professorlary, jas ǵalymdar qatysyp jatyr.
Konferentsııaǵa qatysýshylardyń aıtýynsha, qazirgi ádebıet pen óner – táýelsiz elimizdiń rýhanı-mádenı qundylyqtarynyń negizi, álemdik mádenıettegi ornynyń, órkenıet damýyndaǵy kórkemdik sananyń kórsetkishi.
Sondyqtan elimizdiń rýhanı damý aıasyndaǵy qol jetkizgen tabystaryn, sol jetistikterge jetýdegi ózindik máselelerdi saraptaý asa ózekti.
Konferentsııa jumysynyń baǵyttary:
1.Táýelsizdik jyldaryndaǵy til men ádebıetti zertteýdiń jańa baǵyttary.
2. Táýelsiz Qazaqstan jáne zamanaýı óner.
3. Túrki halyqtarynyń rýhanı murasy: keshe, búgin, erteń.
4.Táýelsiz Qazaqstan jáne Shyǵys álemi.
5.Qazaqstandaǵy jáne álemdegi orys fılologııasy: ıntegratsııa aspektileri.
6. Sheteldik bilim berýdiń zamanaýı ádisnamalyq ustanymdary.
«Bıylǵy jyly elimizdiń táýelsizdik alǵanyna 30 jyl tolyp otyr. Táýelsizdikke ıe bolǵan otyz jyldyń ishinde elimiz ishki jáne syrtqy saıasatynda úlken baısaldy qadamdarymen, ekonomıkada batyl bastamalarymen búkil álemge tanyldy, rýhanı ómirge kóptegen jańa ózgerister endi. Eń aldymen ekonomıkany, áleýmettik salany nyǵaıtý, sonan soń mádenıet pen rýhanııatty órkendetý jolynda janqııar eńbekke toly bul úsh onjyldyq el tarıhyndaǵy aıtýly better boldy. Táýelsizdik ádebıet pen ónerdiń qalyptasýyna sony serpin, jańa baǵyt-baǵdar ákelip, óz damýynda erkindikke qol jetkizdi»,- deıdi Abaı atyndaǵy Qazaq ulttyq pedagogıkalyq ýnıversıtetiniń rektory Darhan Bilálov.