Almatyda Qazaqstannyń lańkestikke qarsy júıesi týraly dóńgelek ústel jıyny ótedi
ALMATY. 14 qarasha. QazAqparat /Erlik Erjanuly/ - Almatyda 16- qarashada «Qazaqstannyń terrorızmge qarsy júıesi. Máseleler dıagnostıkasy jáne qoǵamdaǵy róli» dep atalatyn dóńgelek ústel jıyny bolady. Ony Ulttyq demokratıkalyq ınstıtýt pen Táýekelderdi baǵalaý toby uıymdastyryp otyr. Bul sharaǵa qazaqstandyq saıasatkerler, áskerı sarapshylar, qazaqstandyq BAQ-taǵy saıası sholýshylar, dıplomatıkalyq korpýs jáne halyqaralyq uıymdardyń ókilderi qatyspaq.
Qazaqstanda eldiń qaýipsizdigin qamtamasyz etýge baılanysty quqyqtyq baza («Ekstremızmge qarsy turý týraly» Zańy, «QR ulttyq qaýipsizdik týraly» Zańy, «Dinı qyzmet jáne dinı uıymdar týraly» Zańy) jasalǵan. Sondaı-aq tıym salynǵan ekstremısttik jáne lańkestik uıymdardyń tizimi de jasalǵan. Alaıda sońǵy kezde el aýmaǵynda oryn alǵan birqatar lańkestik oqıǵalar jurtshylyqty erekshe alańdatyp otyr. Mamandardyń aıtýynsha, qoǵamnyń, taldaý qurylymdardyń, quqyq qorǵaý uıymdarynyń jáne BAQ-tyń qatysýynsyz ekstremızmmen jáne lańkestikpen tıimdi kúres júrgizý múmkin emes. Sol sebepti azamattyq qoǵamnyń ınstıtýttary eldegi lańkestikke qarsy júıeniń álsiz jaqtaryn anyqtaýda memleketke kómekke kelip, ekstremızm men lańkestikke qarsy turýda memleket pen qoǵamnyń áreketterin biriktirý boıynsha óziniń tájirıbelik usynystaryn jasamaq.
