Almatyda «Qazaqstannyń ınnovatsııalyq adymy» taqyrybyn saralaǵan jas ǵalymdar otyrysy ótti

ALMATY. 9 jeltoqsan. QazAqparat /Erbol Turymbetov/ - Búgin ál-Farabı atyndaǵy Qazaq ulttyq ýnıversıtetinde «Qazaqstannyń ınnovatsııalyq adymy» atty dóńgelek ústel ótti.

Ony Qazaqstan jastar kongresi men ýnıversıtettiń jastar uıymdarynyń ókilderi birlese uıymdastyrdy. Sharanyń maqsaty - jastardyń ınnovatsııalyq turǵydaǵy áleýetin damytý, jas ǵalymdarǵa qoldaý kórsetý men JOO ınnovatsııalyq úıirmeleriniń tájirıbe almasýyn uıymdastyrý.

«Qazirgi ýaqytta ınnovatsııalyq damý kezeńinde jas ǵalymdarǵa qoldaý kórsetý, olardyń túıtkildi máselelerin sheshýdiń mańyzy zor. Búgingi otyrysta oqylatyn baıandamalardy talqylaý arqyly osy baǵytta tıimdi sheshimder qabyldanady", - dedi Qazaqstan jastar kongresiniń Almaty qalasy boıynsha ókili Danııar Súndetbaev.

Dóńgelek ústel barysynda «Bilim salasyndaǵy ınnovatsııalyq damý», «Jas ǵalymdar keńesiniń qyzmeti» sekildi bilim salasy men jas ǵalymdar eńbegine qatysty birneshe baıandamalar talqylaýǵa tústi.

Basqosý qorytyndysynda birneshe qararlar men jas ǵalymdardyń jobalary Bilim jáne ǵylym mınıstrligine usynylatyn boldy.