Almatyda Qazaqstannyń halyq jazýshysy, aqyn Syrbaı Máýlenovtiń 90 jyldyǵyna arnalǵan saltanatty jıyn ótedi
Bul týraly Syrbaı Máýlenov atyndaǵy qordan habarlady.
Keshke zııaly qaýym ókilderi, ádebıetshiler, izbasar inileri, óner sheberleri, oqyrman qaýym, týystary qatysady.
Syrbaı Máýlenov 1922 jyly 17 qyrkúıekte Qostanaı oblysy, Jangeldın aýdany, Torǵaı kentinde týǵan. Otan soǵysyna qatysqan. Abaı atyndaǵy Almaty memlekettik ýnıversıtetin bitirgen. 1943-1950 jj. Qostanaı oblystyq radıokomıtetinde redaktor, «Bolshevıktik jol» gazetinde bólim meńgerýshisi, redaktordyń orynbasary, 1951-1955 jj. Qazaq memlekettik kórkem ádebıet baspasynda redaktsııa meńgerýshisi, 1957-1961 jj. Qazaqstan Jazýshylar odaǵynda ádebı keńesshi, «Qazaq ádebıeti» gazetinde bas redaktordyń orynbasary, 1964-1971 jj. «Juldyz» jýrnalynyń, 1971-1977 jj. «Qazaq ádebıeti» gazetiniń bas redaktory boldy.
Tuńǵysh óleńi Jambyl oblysy «Kolhozshy» gazetinde 1937 jyly jarııalansa, «Óleńder» atty alǵashqy jınaǵy 1948 jyly jaryq kórdi. Qyryqqa jýyq jyr jınaqtarynyń avtory. «Tańdaýly óleńder» atty tańdamalysy (1958), «Shańqaı tús» jınaǵy (1966), «Tańdamalylary» (2 tomdyǵy, 1972), 1982-1984 jj. úsh tomdyq shyǵarmalar jınaǵy basylyp shyqty. Onyń «Jańa kóktem» (1956), «Dala tańy» (1957), «Kógildir taýlar» (1964), «Jer nári» (1970), «Aprel japyraqtary» (1972), «Tańdamaly lırıkalary» (1972), «Japyraqtar janady» (1972) óleńder jınaqtary orys tilinde Máskeýde basyldy.
«Jer nári» atty ádebı portretter men ocherkter jınaǵy (1966), respýblıka eńbekshileriniń halyq sharýashylyǵyn órkendetýdegi qajyr-qaıratyn kórsetetin «Úrker tóbede tur» (1971) kitaby, estelikter men portretter, etıýdter kitaby jaryq kórdi.
Balalarǵa arnap «Barlaýshy bala» (1961), «Qulynshaq» (1963), «Bala jolbarys» (1963), «Qorqaq torpaq» (1966), t.b. óleńder men áńgimeler jazdy. Orys jáne týysqan halyqtar ádebıeti shyǵarmalaryn qazaq tiline aýdardy.
Abaı atyndaǵy Memlekettik syılyǵynyń ıegeri (1970), Qazaqstannyń Halyq jazýshysy. 1-dárejeli Otan soǵysy, Qyzyl Tý, Halyqtar Dostyǵy, «Qurmet Belgisi» ordenderimen jáne medaldarmen marapattalǵan. Almaty qalasyndaǵy ortalyq kósheleriniń birine esimi berilgen.