Almatyda Qazaqstannyń eńbek sińirgen qaıratkeri Roza Berdiǵalıevaǵa arnalǵan estelik kitaptyń tusaýy kesildi
ALMATY. QazAqparat- Búgin Almatyda QR Ulttyq kitaphanasynda Qazaqstannyń eńbek sińirgen qaıratkeri, 40 jyldan astam ómirin kitaphana isin damytýǵa jumsaǵan maman Roza Berdiǵalıevany eske alý keshi men «Men artymda iz qaldyrǵym keledi» atty kitaptyń tusaýkeser rásimi ótkizildi.
Keshke Roza Amanǵalıqyzynyń áriptesteri, qurby-qurdastary jáne týǵan-týystary jınaldy.
«Kitaphana salasynyń maıtalman mamany Roza Amanǵalıqyzy Berdiǵalıevanyń ómirden ótkenine bir jyl toldy. Ol kisi óz isiniń asqan mamany edi. 40 jyldan astam ǵumyryn kitaphana isin damytýǵa arnady. Respýblıka kitaphanalarynyń álemdik kitaphanalyq keńistikte tanylýyna jol ashty. QR Ulttyq kitaphanasyn 16 jyl basqardy. Onyń «ulttyq» mártebe alýyna, halyqaralyq kitaphanalyq uıymdarǵa múshe bolýyna atsalysty. Bizge qalaı eńbek etýdi, adamdarmen qalaı sóıelese bilýdi úıretti. Roza Amanǵalıqyzynyń joǵary adamgershilik jáne kásibı qasıetteri, ónegeli ómiri búgingi jáne bolashaq kitaphanashylar úshin úlgi bolyp qala beredi», - dedi kesh barysynda QR Ulttyq kitaphanasy bas dırektorynyń mindetin atqarýshy Baqytjamal Ospanova.
Sonymen qatar, kesh barysynda Roza Amanǵalıqyzyna arnalǵan «Men artymda iz qaldyrǵym keledi» atty kitaptyń tusaýy kesildi.
«Biz bul kitapty Roza Amanǵalıqyzynyń 70 jyldyq mereıtoıyna daıyndaýdy josparlap júr edik. Biraq, amal qansha, ol kisi bul kitapty kóre almaı ketti. Kitapqa dostarynyń, qurbylarynyń, áriptesteriniń, týystarynyń estelikteri endi. Bul kitaptyń shyǵýyna Qurmanǵazy atyndaǵy Qazaq ulttyq konservatorııasynyń rektory Jánııa Áýbákirova úlken qoldaý kórsetti», - dedi B. Ospanova.
Eńbek jolyn 1967 jyly bastaǵan Roza Berdiǵalıeva 1976-1984 jyldary Memlekettik Jasóspirimder kitaphanasynyń negizin qalaýshy jáne birinshi dırektory, 1987-2003 jyldary Qazaqstan Respýblıkasy Ulttyq kitaphanasynyń bas dırektory, 2003-2009 j. Astana qalasyndaǵy Ulttyq Akademııalyq kitaphanasynyń bas dırektory jáne taǵy basqa basshylyq qyzmetterdi atqardy. Sondaı-aq, 1989 jyly elimizde alǵashqy avtomattandyrylǵan kitaphanalyq-aqparattyq júıe qurylýynyń bastaýynda turdy.
Roza Berdiǵalıeva Eýrazııa Kitaphanalyq qaýymdastyǵynyń (TMD) alǵashqy saılanǵan prezıdenti, Qazaqstan Respýblıkasynyń Kitaphanalar qaýymdastyǵynyń prezıdenti. «Qurmet» ordeniniń ıegeri.
Búgingi is-shara aıasynda Ulttyq kitaphana qorynan Roza Berdiǵalıevanyń ómiri men qyzmetine arnalǵan «Álem tanyǵan kitaphanashy» atty kitap kórmesi uıymdastyryldy.
