Almatyda Qazaqstannyń derekti kıno óneriniń negizin qalaýshy Oraz Ábishevtiń 100 jyldyq mereıtoıy atap ótildi
ALMATY. QazAqparat - Búgin Almatyda Abaı atyndaǵy Memlekettik akademııalyq opera jáne balet teatrynda Qazaqstannyń derekti kıno óneriniń negizin qalaýshy, Qazaq KSR-niń halyq artısi Oraz Ábishevtiń 100 jyldyq mereıtoıyna arnalǵan eske alý keshi bolyp ótti.
Oǵan Oraz Ábishevtiń balalary men nemereleri, týǵan-týystary, shákirtteri, otandyq jáne TMD-nyń birqatar elderinen kelgen kınematografııa salasynyń maıtalmandary, Qazaqstannyń memleket jáne qoǵam, mádenıet jáne óner qaıratkerleri qatysty.
«QazAqparat» tilshisine bergen suhbatynda belgili kınorejısser, prodıýser Sergeı Ázimov Oraz Ábishevtiń óz zamanynyń rýhyn, jan-dúnıesin, shynaıy beınesin bere bilgen uly sýretker ekendigin aıtty.
«Ábish aǵa óz halqynyń rýhanı ómirimen, mádenıetimen etene jaqyn boldy. Ol qarapaıym eńbek adamdarymen qatar, Dına Nurpeıisova, Kenen Ázirbaev, Qajymuqan, Talǵat Bıgeldınov sekildi qazaqtyń uly tulǵalary týraly da baǵa jetpes qundy fılmder túsirdi. Bul týyndylar qazaq halqynyń altyn qazynasy. Óskeleń urpaq 20-shy ǵasyrdyń orta sheninde, ekinshi jartysynda qazaq halqynyń qalaı ómir súrgenin Oraz aǵanyń derekti fılmderi arqyly da biletin bolady», - dedi S. Ázimov.
Óz kezeginde Oraz Ábishevtiń uly Qanat Ábishev ákesiniń óz isine sheksiz berilgen qarapaıym minezdi adam bolǵandyǵyn jetkizdi.
«Ákemiz óte qarapaıym jan bolatyn. Dostary ony qarapaıymdylyǵy jáne ádildigi úshin jaqsy kóretin. Ol óte eńbekqor edi. Únemi jumysyn oılap júretin. Al otbasyna az kóńil bólýge májbúr boldy. Biraq biz buǵan túsinistikpen qaraıtynbyz jáne ákemizdi óte jaqsy kóretinbiz», - dedi ol.
Al eske alý keshi barysynda Oraz Ábishevtiń otbasyna QR Mádenıet jáne sport mınıstri, Qazaqstan halqy Assambleıasy, Almaty qalasynyń ákimi Baýyrjan Baıbektiń atynan jáne basqa da qoǵamdyq uıymdar tarapynan joldanǵan quttyqtaý hattar tabys etildi.
Sonymen qatar, sahnaǵa shaqyrylǵan KSRO halyq 2rtisi Asanáli Áshimov, Reseıdiń belgili kınorejıseri Alekseı Hanıýtın, Ózbekstannyń belgili kınorejısseri Shuhrat Mahmudov jáne belgili qyrǵyzstandyq kınorejısser Aqtan Arym Qýat óz estelikterimen bólisti.
Asanáli aǵa: «Qazaq halqy turǵanda artyna máńgi ólmes mura qaldyrǵan Oraz Ábishevtyń mereıtoılary áli de toılana beredi», - dese, reseılik qonaq: «Oraz Ábishevtiń qaıtalanbas týyndylary búkil Keńes Odaǵyna tanymal boldy. Sondyqtan, bul mereke otbasynyń jáne qazaq kınematografısteriniń ǵana emes, bizdiń de - burynǵy Keńes Odaǵy respýblıkalary úshin de, Reseı kınematografısteri úshin de mereke», - dedi.
Kesh barysynda Oraz Ábishevtyń derekti kınofılmderinen úzindiler kórsetildi jáne tanymal ánshiler, opera jáne balet teatrynyń solısteri men bıshileri jáne Qurmanǵazy atyndaǵy halyq aspaptary orkestriniń qatysýymen kontserttik baǵdarlama uıymdastyryldy.
Aıta ketelik, Qazaqstannyń derekti kıno óneriniń negizin qalaýshy, Qazaqstannyń halyq artısi Oraz Ábishev 1916 jyly 1 qańtarda Shyǵys Qazaqstan oblysynyń Abaı aýdanyndaǵy Qaınar aýylynda týǵan. 2013 jyly 97 jasynda dúnıe saldy. Kóziniń tirisinde 70-ten astam derekti fılm, 300-ge jýyq kınojýrnaldar shyǵarǵan. Olardyń ishinde Qajymuqan, Dına Nurpeıisova, Kenen Ázirbaev, Talǵat Bıgeldınov syndy uly tulǵalar, sondaı-aq, ataqty Absent jylqysy, Aral teńizi, Beket ata meshiti týraly fılmderdi ataýǵa bolady.
