Almatyda «Qazaqstannyń azyq-túlik naryǵy - 2011» halyqaralyq kórmesi ótedi
Bul týraly búgin Almatyda ótken arnaıy baspasóz máslıhatynda atalmysh sharanyń uıymdastyrýshysy, Qazaqstannyń tamaq jáne óńdeý ónerkásibi taýar óndirýshiler odaǵynyń prezıdenti Anatolıı Popelıýshko málim etti.
«Bıyl shara osymen 13-shi ret ótedi. Kórmege qatysýǵa 60-tan asa ótinish kelip tústi. Dástúrge aınalǵan sharanyń maqsaty - otandyq taýar óndirýshilerdiń jetistigin kórsetý, olardyń shynymen de, sapaly, qaýipsiz taǵam ónimderin alǵa jyljytýyna yqpal etý, tanystyrylymdaryn jasaı otyra jańa ónimderimizdi tutynýshylarǵa usyný, bul saladaǵy jańa tehnologııalarymyzdy, qyzmet túrlerimen tanystyrý, kórmeden kórmege deıin jetken jetistikterimizdi kórsetý bolyp tabylady. Sonymen qatar, naryqqa jańadan shyqqan kompanııalarmen jáne olardyń ónimderimen tanystyrý bolyp tabylady. Biz sonymen qatar, bul salaǵa jas kadrlardy daıyndaýǵa asa kóńil bólemiz. Sondyqtan, osy jyly da olarǵa arnalyp sheberlik synyptar ótedi. Oǵan qalamyzdaǵy kolledj, lıtseı stýdentteri qatysady»,-dedi Qazaqstannyń Tamaq jáne óńdeý ónerkásibi taýar óndirýshiler odaǵynyń vıtse-prezıdenti Nına Bezrýkova.
Onyń aıtýynsha, kórme aıasynda sonymen qatar, semınarlar, tanystyrylymdar, baıqaýlar, tutynýshylyq degýstatsııalar, sonymen qatar ıtalıandyq ónerkásip ıeleriniń qatysýymen «Qazaqstannyń azyq-túlik qaýipsizdigi, bul - densaýlyq, halyq ómiriniń joǵary sapasy» degen taqyrypta dóńgelek ústel ótedi. «Otyrysta qazaqstandyq ónimderdiń Italııa eline, ıtalıandyq taýarlardyń Qazaqstanǵa engizý joldary talqylanatyn bolady»,-dedi N. Bezrýkova.
Onyń pikirinshe, otandyq taýar óndirýshilerdiń ónim sapasy jyldan jylǵa artyp keledi. «Elbasy ónerkásip aldyna «50 damyǵan el qataryna qosylýymyz kerek» degen úlken mindet qoıdy. Bul oraıda bizdiń odaq osy isterdi jasaýda, kórme arqyly qoǵamǵa otandyq azyq-túlik naryǵynyń damýyn kórsetýde»,-dedi ol.
«Bıjan» JShS-tiń basshysy Hadısha Bıjannyń aıtýynsha, kórme qatysýshy kompanııalardyń bir-birimen tájirıbe almasýyna jáne ózara baılanys ornatýlaryna múmkindik beredi. «Kórme sonymen qatar, otandyq taýar óndirýshilerdiń bedelin kóterýge yqpal etip qana qoımaı, azyq-túlik naryǵyndaǵy saýda uıymdarymen qatar, jańadan qurylǵan óndiris oryndaryn qoldaýǵa, jańa ónim túrlerimen tanystyrýǵa yqpal etedi»,-dedi ol.
Qazaqstannyń tamaq jáne óńdeý ónerkásibi taýar óndirýshiler odaǵynyń prezıdenti Anatolıı Popelıýshkonyń aıtýynsha, úsh el arasynda engizilgen Kedendik Odaq qazaqstandyq taýar óndirýshiler úshin Reseı men Belarýstyń naryǵyn ıgerýge, erkin saýda jasaýǵa, naryǵyn keńeıtýge múmkindik berýde.
