Almatyda qazaqstandyq fılosofııanyń áleýmettik jaýapkershiligi talqylanýda
ALMATY. 11 sáýir. QazAqparat - Fılosoftardyń qoǵam aldyndaǵy áleýmettik jaýapkershiligi erekshe. Bul másele búgin Almatyda ótip jatqan «Qazaqstandyq fılosofııanyń áleýmettik jaýapkershiligi: Fılosofııa jáne saıasattaný ınstıtýtynyń jańa maqsattary» dep atalatyn dóńgelek ústelde talqylanýda.
«Ǵylym kúnine arnalǵan bul sharany Fılosofııa jáne saıasattaný ınstıtýty uıymdastyrǵan bolatyn. Maqsat - qazaq fılosoftarynyń qoǵam aldyndaǵy áleýmettik jaýapkershiliginiń mańyzyn kórsetý. Sondaı-aq ınstıtýttyń búgingi tańda qandaı baǵytta jumys istep jatqanynan jurtty habardar etý. Jalpy ǵalymnyń qoǵam aldyndaǵy jaýapkershiligi ár adamnyń óz arynyń aldyndaǵy jaýapkershiligimen ólshenedi», - deıdi ınstıtýttyń dintaný bóliminiń meńgerýshisi Baqytjan Satershınov. Onyń aıtýynsha, alqaly jıynda ártúrli máseleler talqylanyp jatyr. Onyń ishinde - XXI ǵasyrdaǵy qazaqstandyq fılosofııanyń maqsattary, Qazaqstandaǵy farabıtanýdy damytý, qazaq rýhanııatyn zertteý maqsattary men baǵyttary, dintaný salasynda irgeli jáne qoldanbaly zertteýlerdi ózektendirý, qazirgi tańdaǵy saıasattaný máselelerin sheshýdegi dástúrler men ınnovatsııalardyń araqatynasy sııaqty taqyryptar bar.
