Almatyda qazaqstandyq elektrondyq kommertsııa máseleleri talqylandy
ALMATY. Qyrkúıektiń 27-si. QazAqparat /Erbol Turymbetov/ - Qazaqstanda ǵalamtor júıesin zańdastyrý onyń damýyna jaǵdaı jasaıdy.
Bul týraly búgin Almatyda ótken «Internet ınnovatsııalyq bıznes-keńistik retinde» atty dóńgeles ústelde aıtyldy.
Bul basqosýdy Qazaqstannyń ınternet qaýymdastyǵy uıymdastyrdy. Otyrysqa Májilis depýtaty Murat Ábenov, «Qazaqtelekom», «Qazkommertsbank» jáne qaýymdastyq ókilderi qatysty.
Jıynǵa qatysýshylar qazirgi tańda Qazaqstandyq ǵalamtordaǵy avtorlyq quqyq, domendik ataýlardy retteý, elektrondyq kommertsııa máselelerin talqylady. Depýtat M. Ábenovtiń aıtýynsha, elimizdegi ǵalamtordyń kúrdeli máseleleri zańdastyrylýy tıis.
«Basty másele - qazaqstandyq saıttar eń arysy 3 jylǵa deıin qyzmet etedi de, onan soń qarjy tapshylyǵynan nemese basqa jaǵdaılarǵa baılanysty jabylyp qalady. Ony sheshýdiń tıimdi joly - elimizde ınternettiń qoljetimdiligin arttyrý, paıdalanýshylardyń seniminen shyǵý. Sol arqyly ınternet-dúkender qyzmetterin damytý qajet», deıdi «Award.kz ulttyq ǵalamtor-premııasy» qoǵamdyq qorynyń dırektory Konstantın Gorojankın. Onyń aıtýynsha, qazaqstandyq kompıýter qoldanýshylar búginde halyqtyń 80%-yn qurasa, 30%-y ǵalamtor jelisimen jumys isteı alady. Reseı jáne AQSh elderimen salystyrǵanda qazaqstandyq ǵalamtor qoldanýshylardyń deńgeıi sonshalyqty tómen emes.
Sonymen qatar K. Gorojankınniń pikirinshe, 2013 jylǵa qaraı elektrondy kommertsııa naryǵy 5 mlrd. dollarǵa deıin jetedi. Buǵa qosa, ınternette uıaly baılanys tólemderi, kommýnaldyq qyzmetter jáne áýe, temirjol bıletteri satylymdary men basqa da qyzmetter ınternetpen iske asyrylatyn bolady.
