Almatyda Qazaqstandyq Derbı ótti
ASTANA. QazAqparat - Búgin Almatylyq ıppodromda basty at jarystarynyń biri Qazaqstandyq Derbı ótti, dep habarlaıdy Qazaqparat Almaty Deneshynyqtyrý jáne sport basqarmasyna silteme jasap.
Jetinshi at jarysynyń aıasynda osy maýsymnyń segizinshi báıgesi, Jorǵa jarysy jáne Taı jarysy kórermenderdi beıjaı qaldyrmady. Qazaqstannyń túkpir-túkpirinen jáne ózge memleketterden kelgen attar men olardyń shabandozdary ózara myqtyny anyqtady.
Uıymdastyrýshylardyń aıtýynsha, sharanyń basty maqsaty attardy synaý, olardy halyqaralyq jarystarǵa daıyndaý, sonymen qatar, ulttyq sport túrlerin elge tanytý, salaýatty ómir saltyn nasıhattaý.
«Qala ákimdigine jáne Almaty qalasynyń dene shynyqtyrý jáne sport basqarmasyna kórsetken qoldaýy úshin alǵysymdy bildiremin. Ár qatysýshy úshin Qazaqstandyq Derbı ataýymen Kýbok jeńý úlken mártebe. Alaıda, Derbı jarysynda tek úzdikter ózara myqtyny anyqtaıdy, sondyqtan mundaı júldeni utý da ońaı emes. Kýbokpen qatar, biz jeńimpazdarǵa aqshalaı syılyqtar tabystadyq. Máselen, Qazaqstandyq Derbı bedeldi júldesiniń jeńimpazy qala ákimdiginiń atynan aqshalaı syılyqpen marapattaldy. Osy maýsym boıy kómegin úzbegen Almaty qalasynyń ákimdigine rızashylyǵym sheksiz», - dep atap ótti jarym uıymdastyrýshysy Vladıslav Tsoı.
Bul at jarysynan DERBI-di erekshe atap ótýge bolady. Bul osy maýsymnyń eń basty báıgeleriniń biri. Atalmysh júlde úshin 6 úmitker jarys jolyna shyqty, qatysýshylar júırikterdiń júırikteri. Ásirese, Qazaqstandyq OKS júldesiniń jeńimpazy Naıl Impress, «EKSPO» júldesiniń jeńimpazy Meık Memorıs jáne Shańtımesti elimizdiń úzdik úshtigine jatqyzýǵa bolady. Sonymen qatar, Qazaqstanda ósirilgen Shıketan - el maqtanyshy. Aıta keter jaıt, qatysýshylardyń basym bóligi shet elderde ósirilgen.
Atalmysh júldeden basqa segiz at jarysy da bedeldilerdiń qataryna jatady.Onyń biri Favorıt júldesi. Bul báıgede basyp ozǵan shabandoz ben onyń tózimdi aty Brıonı Qyrǵystannan kelgen eken.
«Jeńiske jetkenime asa qýanyshtymyn. Jeńgen sebebim men atyma, atym maǵan sáıkes keledi, bir-birimizdi túsinemiz. Barlyq qarsylastar myqty boldy. Biz jarysqa ekinshi ret kelip otyrmyz. Ótken jyly qolany oljalasaq, osy jyly altyndy jeńý buıyrypty. 200 myń teńge kóleminde aqshalaı syılyq utqanyma da asa qýanyshtymyn, barlyǵyna raqmet!» -dep bólisti jarys jeńimpazy Myqtybek Toqtasynov.
Jeńimpazdar men júldegerler kýbogtarmen jáne aqshalaı syılyqtarmen marapattaldy.
Aıta keter jaıt, 2017 jyly Almaty Ippodromda 350 asyl tuqymdy jylqylardy 11 at jarysy kúnderinde synap, úzdikterin anyqtaý josparlanǵan.
