Almatyda Qazaqstandaǵy jaıylym resýrstaryn ońtaıly basqarýdyń jańa modeli tanystyryldy - Almatydaǵy konferentsııa
ALMATY. 16 qarasha. QazAqparat /Názıra Eleýhan/ - Búgin Almatyda QR Aýyl sharýashylyq mınıstrliginiń qoldaýymen «Qazaqstan men Ortalyq Azııadaǵy jaıylym resýrstaryn ornyqty basqarýdyń nátıjeli tájirıbesi» atty ekikúndik halyqaralyq ǵylymı-praktıkalyq konferentsııa bastaldy.
Onyń jumysyna QR Aýyl sharýashylyq mınıstrliginiń, «QazAgro» ulttyq holdınginiń, Qyrǵyzstan, Tájikstan, Ózbekstan, Túrikmenstan elderiniń ókilderi, sondaı-aq halyqaralyq uıymdar men fermerler, jergilikti bılik ókilderi qatysýda.
Búgin konferentsııada «Qazaqstandaǵy jaıylym resýrstaryn basqarýdyń jańa modeli» jobasy tanystyryldy.
Jańa model - Qazaqstandaǵy jaıylymdy qandaı baǵytpen, qandaı strategııamen paıdalaný kerek, qalaı damytyp, ıgerý qajet, qalaı paıdasyn kórý kerek, qalaı aýyl sharýashylyǵyn tıimdi de, durys damytý kerek degen suraqtarǵa naqty jaýap beredi. Joba sondaı-aq, zańdyq quqyqtyq bazasyn jetildirýdi, jaıylym qoldaýshylar kooperatıvin qurý, azyqtyq, jemshóptik resýrstardy durys qoldanýdy, aýyl sharýashylyq maldarynyń genetıkalyq potentsıalyn kóterý syndy máselelerdi qarastyrǵan. Atalmysh jobanyń menedjeri Sadyq Baqtııardyń aıtýynsha, joba praktıkalyq tájirıbe negizinde jasalǵan. «Bul joba Almaty oblysy Jambyl aýdanynda úlken jetistikpen iske asty. Sondyqtan, bul tájirıbeni búkil elimiz boıynsha jetistikpen qoldanýǵa bolady»,-dedi ol.
Erteń, 17 qarasha kúni atalmysh shara aıasynda konferentsııa qatysýshylary Almaty oblysy Jambyl aýdanynyń Úlgili aýylynda bolady. Onda olar jaıylym qoldanýshylar kooperatıv múshelerimen kezdesedi. Sonymen qatar shara barysynda jaıylym sharýashylyǵyn ınnovatsıalyq túrde júrgizýdiń tásilderi kórsetiletin bolady. Sondaı-aq, jergilikti malshylarǵa kún batareıasymen jabdyqtalǵan, zamanaýı úı vagonyn tabystaý rásimi ótedi.
