Almatyda Qazaqstandaǵy jastar saıasaty talqylandy
ALMATY. Mamyrdyń 7-si. QazAqparat /Názıra Eleýhan/ - Búgin ál-Farabı atyndaǵy Qazaq Ulttyq ýnıversıtetiniń saıasattaný jáne fılosofııa fakýltetinde «Jastar jáne Qazaqstan Respýblıkasyndaǵy jastar saıasaty» degen taqyrypta «Polıtolog» stýdentter klýbynyń osy maýsymdaǵy sońǵy májilisi ótti,
dep habarlaıdy QazAqparat.
Jıynǵa saıasattanýshylar, Qazaqstan Jastar odaǵynyń, "Saıası konıýnktýra" ortalyǵynyń ókilderi jáne JOO-nyń stýdentteri qatysty.
"Jastardyń áleýetin iske asyrý úshin, olardyń óz tarapynan bastamashyldyq kerek jáne memlekettiń qoldaýy qajet", dedi otyrys barysynda sóz sóılegen saıası-gýmanıtarlyq konıýnktýra ortalyǵynyń dırektory, saıası ǵylymdar doktory Esenjol Alııarov.
Ol sonymen qatar, "memleket jastar saıasatyn qalyptastyra otyra, keleshekte mańyzdy áleýetti salmaǵy bar jastardyń qoǵamnyń belsendi múshesi ekendigin eskeredi", dep atap ótti.
Stýdentter jáne klýb músheleri qonaqtarǵa suraq qoıa otyryp, bul saladaǵy saıasattyń negizgi baǵyttaryn ǵana emes, sonymen qatar búgingi zaman jastarynyń máselelerin de talqylady.
Qazaqstan Jastar odaǵynyń tóraǵasy Áset Turdyǵulov Odaqtyń jumysymen tanystyryp, óz bastamalary jaıynda, respýblıkanyń barlyq aımaǵyndaǵy jastar birlestikterimen yntymaqtastyǵy týraly aıtyp berdi.
Jıyn sońynda klýb músheleri azamattyq belsendilikterin kórsetip, Almaty oblysyndaǵy Kólsaı kólin tazalaýǵa arnalǵan "Sý qoımalaryn tazalaý kúni" atty jobaǵa atsalysýǵa sheshim qabyldady.
Búginde Qazaqstan turǵyndarynyń 30 paıyzyn jastar quraıdy.
