Almatyda Qazaqstandaǵy vıtraj óneriniń alǵashqy kólemdi kórmesi ashyldy

Atalmysh sharanyń uıymdastyrýshysy - Qazaqstan Respýblıkasy Tuńǵysh Prezıdenti Qorynyń, Almaty qalasy ákimdiginiń, jastar saıasatyn damytý Qorynyń qoldaýymen, T.Júrgenov atyndaǵy Qazaq Ulttyq óner akademııasy.

Kórmege «Domovoı» (Usta aýlasy), «Alkıon», «Shyny qııal», «Etno-mura», «Art Glass», «Stounhead», «Sat Glass» syndy vıtrajdy órnekteý, mozaıka jasaý, tıffanı, fıýzıng jáne taǵy da basqa shyny materıaldaryna kúrdeli kompozıtsııa jasaýmen aınalysatyn jaýapkershiligi shekteýli seriktester, sonymen qatar, Ál-Farabı atyndaǵy Qazaq Ulttyq Ýnıversıtetin jáne T.Júrgenov atyndaǵy Qazaq Ulttyq óner akademııasy stýdentteri qatysýda.

«Mundaı shara stýdentterimizdiń ónerin kórsetýge múmkindik týǵyzyp qana qoımaı, jastardyń shyǵarmashylyq izdenisterin shabyttandyrýǵa yqpal etedi. Bul kórmeni kórgen jurtshylyqtyń ónerdiń osy aǵymyna degen qyzyǵýshylyqtary odan ári arta túsedi dep senemin»,-dedi T.Júrgenov atyndaǵy Qazaq Ulttyq óner akademııasynyń keskindeme jáne músin fakýltetiniń dekany, dotsent Baýyrjan Baıdildá.

Atalmysh oqý orynnyń dotsenti Tólegen Súleımenovtyń aıtýynsha, vıtraj óneriniń damý protsesi búginde túrli tehnologııalyq ózgeristerge ushyraǵan. «Vıtraj monýmentaldy ónerdiń birden-bir jarqyn kórinisi bolyp tabylady. Bul ıntererdiń bir elementi ǵana emes, óz aldyna derbes kórkemóner shyǵarmasy. Sońǵy ýaqyttarǵa deıin, vıtraj isi sheberleriniń daıyndyq bazasy bolmaǵandyqtan vıtraj ónerden alshaqtap, elenbeı keldi. Qazirgi tańda T.Júrgenov atyndaǵy QazUÓA tsehynda fıýzıng, tıffanı, frıvolıt, lak quıý tehnıkalaryn ıgergen mamandardy daıyndap shyǵýǵa múmkindik ashyldy. Munda alǵash ret 2008-2009 oqý jyldarynda vıtraj sheberhanasy ashyldy. Búginde osy fakýltette 50-den asa stýdent bilim alýda. Olardyń kópshiligi ár túrli baıqaýlardyń jeńimpazdary. Qazirgi ýaqytta fakýltet 2-3 jeke kompanııalarmen baılanys ornatty. Biz olarǵa materıaldyq múmkindigi bar bazamyz joq bolǵandyqtan, tek eskızimizdi ǵana usynýdamyz. Aldaǵy ýaqytta osy másele sheshilse jaqsy bolar edi. Biz de ózimiz jasaı alamyz, talantty jastarymyz kóp, ony jasaý ońaı. Tipti, qazirden usynatyn taqyryptarymyz, oılarymyz, eskızderimiz bar», -dedi ol.