Almatyda Qazaqstandaǵy ulttyq ıdeıa týraly kitap jaryq kórdi
; ALMATY. Aqpannyń 17-si. QazAqparat /Názıra Eleýhan / - HHI ǵasyrda Qazaqstandaǵy Ulttyq ıdeıa ózekti máseleniń biri bolyp otyr. Buqaralyq aqparat quraldarynda bul taqyryp jóninde pikirtalas eshqashan tolastaǵan emes.
«Qazaqstandaǵy ulttyq ıdeıany» zertteý barysyna barlyq basylymdar atsalysty. Saraptaýǵa túsken qazaq tildi, túrli pozıtsııadaǵy merzimdi basylymdar arasynda ortaq komponentter kezdesti, qazaq tili máselesine kelgende barlyq BAQ, memlekettik te, oppozıtsııalyq ta basylymdar birdeı ún qatty. Qazaq tili máselesi búgingi kúni eń ótkir másele bolyp otyrǵandyǵy anyqtaldy. Bul týraly búgin Almatyda Ál-Farabı atyndaǵy Qazaq Ulttyq ýnıversıtetinde «Qazaqstandaǵy ulttyq ıdeıa: problemalardy sheshý joldary» atty oqý quralynyń tanystyrylymy barysynda fılologııa ǵylymdarynyń kandıdaty, dotsent Gúlmıra Sultanbaeva málim etti, dep habarlaıdy QazAqparat.
«Ultaralyq birlik, ulttardyń teń quqyqtyǵy sııaqty máseleni ár pozıtsııadaǵy BAQ teńdeı qarap otyr. Olar ár qyrynan jazyp, ár taraptan qaraǵanymen de, bul salada biryńǵaı konsensýs baıqaldy. Otansúıgishtik, patrıotızm máselesi, bylaı qaraǵanda jabyq, jasyryn sıpattaǵy qubylys sııaqty, degenmende bul oraıda BAQ - ulttyq ıdeıany qalyptastyrýshy, basty faktorlardyń biri retinde tanyldy. Bul elimizdiń damýy úshin qýanyshty jaǵdaı. Biz endi, elimizdiń ekonomıkalyq damýyna jol bergennen keıin, ótkenimizdi, rýhanı dúnıemizdi baıytyp baryp, Qazaqstan qoǵamynyń rýhanı dúnıesin baıytýda ulttyq ıdeıanyń qajettigin endi túsinip, moıyn usynyp jatyrmyz. Bul qoǵamnyń rýhanı saýlyǵy, barlyq jaǵynan alǵanda damýymyzdyń kepili», dedi qazaq baspasózindegi ulttyq ıdeıany zerttegen ǵalym Gúlmıra Sultanbaeva. Jıyn barysynda ol sonymen qatar, genderlik teńsizdiktiń qoǵamda qoldaý taýyp ta, synalyp ta jatqan másele bolyp otyr dedi.
Joba jetekshisi, professor Láıla Ahmetovanyń aıtýynsha, bul joba memleket tarapynan qoldaý tapqan. «Ulttyq ıdeıa» baǵdarlamasynyń aıasynda QazUÝ-de 17 avtorlyq ujym, ıaǵnı 17 joba jumys isteıdi. Árqaısysynyń óz maqsat- mindetteri bar, dedi L. Ahmetova.
Oqý quraly jýrnalısterge, gýmanıtarlyq fakýltettiń stýdentterine jáne saıasattaný, tarıh, fılosofııa, áleýmettaný, mass-medıa máseleleri qyzyqtyratyn jalpy kópshilikke arnalǵan.
