Almatyda «Qazaqstandaǵy Stalındik qasiret» máselesi talqylandy
ALMATY. Aqpannyń 24-i. QazAqparat /Erbol Azanbek/ - Búgin Almatyda «Stalınızm: repressııalanǵan Qazaqstan» atty halyqaralyq ǵylymı-tájirıbelik konferentsııa ótti,
dep habarlaıdy QazAqparat.
«Keńes Úkimeti tusynda qazaq halqy 3 ret jasandy ashtyqty bastan keshirip, 1917-19, 1921-23, 1931-33 jyldary 4 mıllıonnan astam adamnan aıyryldy. Bunyń syrtynda san myń adam jazyqsyz qýǵyn-súrgin qurbany boldy. Osy istiń basynda Stalın turǵany málim. Sondyqtan búgingi konferentsııa barysynda Stalınniń Qazaqstanǵa salǵan zobalańy, sebep-saldary jaıly talqylaýdy jón kórdik» deıdi «Ádilet» tarıhı-zertteý qoǵamynyń prezıdenti, jazýshy Beıbit Qoıshybaev.
«Reseıde Stalın týraly qyzý pikir-talas júrip jatyr. Bizde de Stalın zobalańynyń azabyn tartqan el retinde onyń beınesin ashyp kórsetýimiz kerek. Búgingi otyrys osy istiń basy bolýy tıis», deıdi tarıh ǵylymynyń doktory, professor Mámbet Qoıgeldi. Shara sońynda konferentsııaǵa qatysýshylar Qazaqstan halqyna arnalǵan úndeý qabyldady.
Sharany «Ádilet» tarıhı-zertteý qoǵamy, QR Ortalyq memlekettik muraǵaty, Kınofotoqujattar jáne dybys jazbalar ortalyq muraǵaty, «Alash» tarıhı zerteý ortalyǵy, Qazaqstan tarıhshylar qaýymdastyǵy men A.Sársenbaıuly atyndaǵy qoǵamdyq qor uıymdastyrdy.
