Almatyda Qazaqstanda ulttyq biregeılikti qalyptastyrý máselesi talqylandy
ASTANA. QazAqparat - Búgin Almaty qalasynda QR Tuńǵysh Prezıdenti - Elbasy Qory janyndaǵy Álemdik ekonomıka jáne saıasat ınstıtýty «Ulttyq biregeılikti qalyptastyrý men jandandyrý» taqyryby boıynsha dóńgelek ústel ótkizdi.
Dóńgelek ústel jumysyna belgili otandyq sarapshylar men saıasattanýshylar qatysty. Olardyń qatarynda: Aıdar Ámirebaev - Qoldanbaly saıasattaný men halyqaralyq zertteýler ortalyǵynyń jetekshisi; Aıdos Sarym - saıasattanýshy; Rústem Qadyrjanov - QR BǴM ǴK fılosofııa, saıasattaný jáne dintaný ınstıtýty saıasattaný bóliminiń etnosaıası zertteýler sektorynyń meńgerýshisi; Qanat Nurov - «Aspandaý» qorynyń prezıdenti; Bórihan Nurmuhamedov - saıasattanýshy; Dáýren Sákenuly - «Reıtıng.KZ» zertteý agenttiginiń dırektory.
Dóńgelek ústelge qatysýshylar Memleket basshysynyń «Rýhanı jańǵyrý: bolashaqqa baǵdar» baǵdarlamalyq maqalasy aıasynda Qazaqstandaǵy ulttyq biregeılikti qalyptastyrý men jandandyrý jáne júzege asyrý máselelerin, sonymen qatar, bul protsesske áser etetin faktorlardyń aldyn-alýdy talqylady.
Sarapshylardyń aıtýynsha, ýrbanızatsııa men mádenı jahandaný protsessterine baılanysty ózgerip otyratyn qoǵam men qoǵamdyq sananyń daǵdylanýy áleýmettik-ekonomıkalyq jetistiktiń mańyzdy kórsetkishi bolyp tabylady. Sondaı-aq, qatysýshylar ulttyq mádenı kod pen ulttyq biregeılikti saqtaý, ulttyq sananyń ártúrli polıýsterin kelistirý de óte mańyzdy shart ekenin atap ótti.
Jalpy, pikirtalasqa qatysqan mamandar bizdiń qoǵamǵa qatysty jańǵyrtý jumystary qalaı júzege asatynyn áli de túbegeıli zerteý kerektigin aıtty. Olardyń sózinshe, ulttyq biregeılikke qatysty jańǵyrtý protsessi barysynda týyndaıtyn ishki jáne syrtqy syn-tegeýrinderge kóp kóńil bólý kerek.
Atap óteıik, ÁESI pikirtalas alańy Ult Kóshbasshysynyń strategııalyq ıdeıalaryn nasıhattaý men olardy júzege asyrýdaǵy tájirıbelik joldardy qalyptastyrý maqsatynda jumys jasap keledi.
Eske sala keteıik, Qazaqstan Respýblıkasynyń tuńǵysh Prezıdenti - Elbasy Qorynyń janyndaǵy álemdik ekonomıka jáne saıasat ınstıtýty 2003 jyldan beri jumys istep keledi. ÁESI Qazaqstan Respýblıkasy Tuńǵysh Prezıdentiniń memlekettilikti qurý men qalyptastyrý, halyqaralyq seriktestikti damytý, beıbitshilik pen turaqtylyqty saqtaýdaǵy eleýli eńbekterin zertteıdi. ÁESI ǵylymı jáne analıtıkalyq jumystary ulttyq, álemdik ekonomıkanyń, halyqaralyq qarym-qatynastyń, geosaıasattyń, qaýipsizdiktiń, ıntegratsııanyń, qazaqstandyq qaýymdastyqtyń áleýmettiń shoǵyryn, sonymen qatar, QR Tuńǵysh Prezıdenti - Elbasynyń strategııalyq bastamalarynyń aýqymdy spektrin qamtıdy. 2014 jyldan bastap ÁESI Astanadaǵy «Nazarbaev ortalyǵy» ǵımaratynda jumys jasaýda.
