Almatyda Qazaqstanda bilim alyp jatqan sheteldik qazaq stýdentteri arasynda baıqaý ótip jatyr
ALMATY. Maýsymnyń 3-i. QazAqparat /Názıra Eleýhan/ -Búgin Almatyda ál-Farabı atyndaǵy Qazaq ulttyq ýnıversıtetinde atalmysh oqý orynynyń jáne Halyqaralyq «Janashyr» qoǵamdyq qorynyń uıymdastyrýymen Qazaqstanda bilim alyp jatqan sheteldik qazaq stýdentteri arasynda «Atamekenim - Qazaqstan!» atty baıqaý ótip jatyr.
Baıqaýǵa QazUÝ-de shet eldiń 12 memleketinen, atap aıtqanda, Frantsııa, Saýd Arabııasy, Iran, Túrkııa, Mońǵolııa, Qytaı, Ózbekstan, Tájikstan, Túrikmenstan, Reseı jáne taǵy da basqa elderinen kelip bilim alyp jatqan stýdentterdiń bıylǵy túlekteri qatysýda. Olar qazaqtyń salt-dástúri men ádet-ǵurpy jáne til salasynan ıgergen bilimderin kórsetip, saıysqa túsýde. Baıqaýdyń negizgi maqsaty - Qazaqstanǵa kelip bilim alyp jatqan sheteldik qazaq jastarynyń boıynda atamekenge degen patrıottyq sezimi men súıispenshiligin oıatý, sheteldik qazaq jastaryn qazaq ultynyń salt-dástúri men án-kúıin bilýge baýlý, olardyń ádebı shyǵarmashylyǵyn damytý, qazaqtyń mádenıeti men ádebıetin, án-kúıi men bıin ózderi turatyn elde tanystyrý, ári nasıhattaý, sheteldik jastardyń osy nıetin barynsha qoldaý bolyp tabylady.
«Bul shara bizdiń oqý ornynda alǵash ret uıymdastyrylyp otyr. Sheteldik qazaq stýdentteri úshin ashylǵan arnaıy fakýltettiń jumys isteı bastaǵanyna úsh jyl boldy. Baıqaý «Qazaqstan táýelsizdiginiń 20 jyldyǵyna - 20 shara» atty jobany júzege asyrý jáne jetken jetistikterdi kórsetý maqsatynda uıymdastyrylýda», dedi QazUÝ-niń tárbıe isi jáne til jónindegi departamentiniń dırektory Gúlnar Sársenbekova.
