Almatyda Qazaqstan Jazýshylarynyń kitap kórmesi ashyldy

Mádenı shara Qazaqstan Jazýshylar odaǵynyń 75 jyldyq mereıtoıy qarsańynda uıymdastyrylyp otyr. Kórme 10 bólimnen turady. Olar: «Jazýshylar odaǵynyń shejiresi», «Arystar men alyptar», «Qazaqstan Jazýshylar odaǵy basqarmasynyń tóraǵalary», «Qazaqstannyń Halyq jazýshylary», «Ádebıet - jan daýasy», «Óleń sózdiń patshasy», «Ǵylymı zertteýler aıdyny», «Álem ádebıeti qazaq tilinde», «Odaqtyń basylymdary» jáne «Qazaqstan Jazýshylar odaǵy jáne QR Ulttyq kitaphanasy».

«Osydan 77 jyl buryn Jazýshylar odaǵynyń birinshi quryltaıy atalyp ketken úlken jıynda Sáken, Іlııastar baıandama jasaǵan edi. Mine, sodan bergi Odaqtyń 75 jyldyq tarıhynan syr shertetin qanshama jádigerlerimiz osy kórmede qoıylǵan. Munda ádebıet tarıhyndaǵy Abaı men Jambyl bastaǵan ulylardyń shyǵarmalarymen birge, 38 halyq jazýshysynyń týyndylary bar», dedi Qazaqstan Jazýshylar odaǵynyń tóraǵasy Nurlan Orazalın.

Saltanatty sharanyń lenta qııý rásimin belgili aqyn-jazýshylar Tumanbaı Moldaǵalıev, Qadyr Myrzalıev, Ázilhan Nurshaıyqov, Tursynbek Kákishev jáne Iran Ǵaıyp (Iranbek Orazbaev) jasady.

«Kitap - eskertkish, kitap - rýhanı qazyna. Ol adamnyń jan dúnıesin baıytyp otyratyn taýsylmas baılyq. Sondyqtan da osyndaı sharanyń uıymdastyrylýy oqyrmandar úshin, halqymyz úshin mańyzy zor», deıdi fılologııa ǵylymdarynyń doktory, professor Tursynbek Kákishev.

Uıymdastyrýshylardyń aıtýynsha, Odaqtyń 75 jyldyq mereıtoıy qyrkúıektiń 21-i kúni Abaı atyndaǵy opera jáne balet teatrynda ótedi dep josparlanǵan. Oǵan Reseı, Kavkaz elderi, Orta Azııa memleketteri men basqa da shetelderden qonaqtar keledi dep kútilýde.