Almatyda Qazaqstan Jazýshylar odaǵynyń 75 jyldyǵyna oraı saltanatty jıyn ótip jatyr
Y. Qyrkúıektiń 21-i. QazAqparat /Ádilet Musahaev/ - Búgin Almatydaǵy Abaı atyndaǵy MAOBT-da Qazaqstan Jazýshylar odaǵynyń qurylǵanyna 75 tolýyna oraı saltanatty jıyn ótip jatyr, dep habarlaıdy QazAqparat.
Saltanatty jıyndy Almaty qalasynyń ákimi Ahmetjan Esimov ashyp, Elbasy Nursultan Ábishuly Nazarbaevtyń quttyqtaý sózin jetkizdi. "Qadirli qalamgerler, barshańyzdy ulttyq múddege qyzmet etip kele jatqan Jazýshylar odaǵynyń 75 jyldyq mereıtoıymen quttyqtaımyn. Jazýshylar odaǵynyń búgingi toıy qazaq ádebıetiniń ǵana emes jalpy mádenıetimizdiń aıtýly belesi, mereıli qýanyshy dep bilemin. Odaq osy jyldar ishinde árdaıym zııaly qaýymdy bir maqsatqa uıymdastyryp, udaıy halyqtyń sózin sóılep joǵyn joqtady. Eldiń eńsesin kóterip, rýhyn shyńdady", delingen quttyqtaýda.
1934 jyly Almatyda tusaýy kesilgen Qazaqstan Jazýshylar odaǵy 1938 jyly óziniń alǵashqy uıymdastyrý quryltaıyn ótkizgen bolatyn.
El taǵdyry men jer taǵdyry qyl ústinde turǵan kezde ómirge kelgen Jazýshylar odaǵynyń úlken mindetteriniń biri - aýyz ádebıetinen tamyr tartqan, Abaı poezııasynan bastaý alǵan jazba ádebıetimizdiń baı murasyn jınaý men eksheý, damytý men qorǵaý jáne ony keńinen nasıhattaý.
Jazýshylar odaǵyn ár jyldarda Sábıt Muqanov, Muhamedjan Qarataev, Dıhan Ábilev, Ábdilda Tájibaev, Ǵabıden Mustafın, Ǵabıt Músirepov, Juban Moldaǵalıev, Oljas Súleımenov, Qaldarbek Naımanbaev syndy qalamgerler basqarǵan.
1996 jyldan beri atalmysh odaqqa Nurlan Orazalın basshylyq jasap keledi.
Qazaqstan Jazýshylar odaǵy 755 qalamgerdiń basyn qosyp otyrǵan shyǵarmashylyq ujym bolyp tabylady.
Atalǵan sharaǵa jazýshylar men zııaly qaýym ókilderi, alys jáne jaqyn shetelderden kelgen qonaqtar qatysýda.
