Almatyda Qazaqstan Teńiz akademııasynyń alǵashqy túlekterine dıplomdar tabys etildi

Bul oqý orny elimizde tuńǵysh ret 2012 jyly Elbasy N. Nazarbaevtyń bastamasymen ashylǵan bolatyn. 4 jylǵa sozylǵan oqý barysynda kadetter teńiz isi salasynda keme júrgizý jáne keme mehanıgi mamandyqtaryn meńgerdi.

Qazaqstan Teńiz akademııasy Qazaqstannyń kólik-logıstıkalyq sektoryn damytý maqsatynda qurylǵan. Qazirgi tańda Qazaqstan Kaspıı óńirinde teńiz elderiniń birine aınalýǵa umtylyp jatqany belgili. Sáıkesinshe, Qazaqstannyń teńiz akademııasyn qurý jobasy Úkimetke qazaqstandyqtardy munaıgaz sektorynan basqa da salalarda jumysqa ornalastyrýǵa baǵyttalǵan mindetterdi júzege asyrýǵa septigin tıgizedi. 

Bul jerde Qazaqstan teńiz akademııasyn qurýǵa QR «Saýda maqsatynda teńizde júzý týraly» zańy mańyzdy ról atqardy.

Soǵan sáıkes, 2015 jyldyń 1 qańtaryna qaraı, Qazaqstannyń jalaýymen júzetin kemelerdegi aǵa komandalyq quram (kapıtandar, kapıtannyń aǵa kómekshileri jáne aǵa mehanıkter) Qazaqstannyń azamattarynan quralýy tıis.     

QBTÝ baspasóz qyzmetiniń habarlaýynsha, búgin joǵary oqý ornyn bitirgen 16 kadetke dıplomdar tabys etildi.  Olardyń ishinde beseýi - qyz, qalǵany - uldar. Sondaı-aq, olardyń ishinde 10 túlek  keme júrgizýshisi, al 6 túlek - keme mehanıgi mamandyǵyn alyp shyqty. Sóıtip, Qazaqstanda tuńǵysh ret halyqaralyq deńgeıdegi kásibı teńizshiler atandy.   

Qazaqstan Teńiz akademııasynyń ashylýyna «Teńizshevroıl» JShS muryndyq bolǵan. Qazir de oqý ornynyń negizgi demeýshileriniń biri.