Almatyda «Qazaqstan tatarlary» kitabynyń tusaýy kesildi
ALMATY. QazAqparat - Almatyda Ulttyq kitaphanada «Qazaqstan tatarlary» kitabynyń tusaýkeseri ótti, dep habarlaıdy QazAqparat tilshisi.
Týyndy Qazanda basylyp shyqqan. Búgin kitapty kópshilikke tanystyrýǵa Qazan ýnıversıtetiniń professory Rafaıl Shaıdýllın men tatar entsıklopedııasy ınstıtýtynyń ókili Býlat Hamıdýllın keldi.
Jańa baspada Qazaqstanda týyp, ómir súrip jatqan nemese qaıtys bolǵan 300-ge jýyq qoǵam qaıratkeri, revolıýtsııaǵa deıingi qoǵamdyq uıymdar, basylymdar týraly aqparat berilgen.
Sonymen qatar, Qazaqstan tatarlarynyń ómiri, qyzmeti, ulttyq dástúrleri, kórkemóner uıymdary júıeli túrde sıpattalǵan.
Entsıklopedııalyq anyqtama Qazaqstan men Tatarstanda turyp jatqan tatarlardyń tarıhı-mádenı baılanysy týraly syr shertedi.
Qazan ýnıversıtetiniń professory, tarıh ǵylymdarynyń doktory, TR ǵylym akademııasy Tatar entsıklopedııasy jáne aımaqtaný ınstıtýtynyń entsıklopedıstıka ortalyǵynyń meńgerýshisi Rafael Shaıdýllınniń aıtýynsha, bul kitap 2014 jyly Tatarstanda bastalǵan «Tatar halqynyń ulttyq biregeıligin saqtaý» memlekettik baǵdarlamasynyń aıasynda basylyp otyr.
«Qazaqstanda qazir 230 myńnan asa tatar ómir súrip jatyr. Biz Qazaqstandaǵy tatarlardyń ómirin, eki el arasyndaǵy tarıhı mádenı baılanysty, ulttyq taǵam túrlerin, folklordy kórsetkimiz keldi. Revolıýtsııaǵa deıin Qazaqstanda birikken mýzykalyq, qaıyrymdylyq qorlary bolǵan eken. 30 jýyq merzimdi basylym shyǵyp turǵan. Osynyń bárin jergilikti muraǵattarǵa saýal jiberý arqyly anyqtadyq», - dedi R.Shaıdýllın.
TR ǵylym akademııasy Tatar entsıklopedııasy jáne aımaqtaný ınstıtýtynyń entsıklopedıstıka ortalyǵynyń ókili Hamıdýllın Bolattyń aıtýynsha, atalǵan ortalyqta budan ózge tatarlardyń ómir súretin aımaqtary týraly kitap jaryq kórgen.
Turan ýnıversıtetiniń professory, p.ǵ.d Haırýllın Grıf bul kitaptyń eki el arasyndaǵy dostastyqtyń damýyn úlken yqpaly tıetinin tilge tıek etti.
«Munda belgili qazaqstandyq tatarlardyń esimi endi. Onymen qatar Abaı, Muhtar Áýezov, Nursultan Nazarbaev sııaqty belgili tulǵalar da endi. Óıtkeni, Nursultan Ábishuly bizdiń memleketimizdiń ókili. Osy elde esh kedergisiz ómir súrip kelemiz», - dedi Grıf Haırýllın.
