Almatyda «Qazaqstan onkologııasy. Keshe. Búgin. Erteń» mereıtoılyq konferentsııasy ótip jatyr
ALMATY. QazAqparat - Almatyda «Qazaqstan onkologııasy. Keshe. Búgin. Erteń» halyqaralyq konferentsııasy bastaldy, dep habarlaıdy QazAqparat tilshisi. Bul shara Qazaq onkologııa jáne radıologııa ǵylymı zertteý ınstıtýtynyń ashylǵanyna 60 jyl tolýyna oraı uıymdastyrylǵan.
Konferentsııanyń ashylýynda QR DSM basshysy Alekseı Tsoı QR Prezıdenti Ákimshiligi basshysynyń birinshi orynbasary Dáýren Abaevtyń quttyqtaý sózin oqydy.
«Konferentsııa qatysýshylaryn quttyqtaımyn. Bul ınstıtýt - otandyq medıtsınanyń flagmany. Qazirgi zamanda onkologııa máseleleri óte ózekti bolyp otyr. Onymen kúreske kóp mólsherde resýrs jumsalady. Ókinishke oraı, bizdiń el de solardyń ishinde bar. Qazaqstanda onkologııalyq aýrýlardy emdeý tolyǵymen memleket esebinen júrgiziledi. Mundaı kómek kez kelgen elde kórsetilmeıdi. Osy jerde Qazaq onkologııa jáne radıologııa ǵylymı zertteý ınstıtýtynyń rólin aıtpasqa bolmaıdy. Bul ınstıtýt dıagnostıka jáne emdeýde aldyńǵy zamanaýı qural jabdyqtardy paıdalanady. Sonymen qatar, profıldi kadrlardy tárbıeleıtin sheberhana. Osy oraıda birinshi dırektory Nuǵmanov Sáken Nuǵmanulyn, Balmuhanov Saım Balýanulynyń eńbegin atap ótý kerek. Qazir ınstıtýt ujymy erte dıagnostıka, ońaltý, psıhologııalyq kómek berýmen aınalysady. Búgingi konferentsııa Qazaqstan onkologtarynyń qaterli isikke qarsy kúrestiń jańa tásilderin tabýǵa umtylysyn kórsetedi. Osy jıynnyń otandyq onkologııany damytýǵa septigin tıgizerine senimdimin»,- delingen quttyqtaýda.
Mereıtoılyq konferentsııada ınstıtýttyń 60 jyldaǵy ǵylymı jetistikteri, qaterli isikke qarsy kúrestiń zamanaýı tásilderi, sáýleli terapııanyń joǵary tehnologııalyq tásilderi, targettik terapııa men ımmýnoonkologııa, ońaltý jáne pallıatıvti kómek, COVID-19 pandemııasy aıasynda onkologııalyq kómek kórsetý máseleleri sóz bolmaq.
Sondaı-aq, onkogınekologııa, mammologııa, onkoýrologııa salasynda master klastary ótkiziledi.
Alqaly jıynǵa álemniń 12 elinen: Avstralııa, AQSh, Ispanııa, Shveıtsarııa, Germanııa, Túrkııa, Reseı, Grýzııa, Belarýs, Koreıa, Italııa jáne Ózbekstannan kelgen mamandar qatysýda.
