Almatyda Qazaqstan men Reseıdiń dıplomatııalyq qatynastarynyń 25 jyldyǵy atalyp ótti
ALMATY. QazAqparat - Eki el arasyndaǵy dıplomatııalyq qatynastardyń 25 jyldyǵyn atap ótýge qýyrshaq sheberleri de qoıylymnyń avtorlary da erekshe yqylas tanytty, dep habarlaıdy QazAqparat.
Ataýly merekege oraı qýyrshaq sheberleri «Máńgige birgemiz» (Vmeste navsegda) atty kórmege ózderi arnaıy daıyndaǵan teńdessiz eńbekterin alyp keldi.
«Qýyrshaqtar túrli tehnıka tásilimen daıyndalǵan. Olardyń birin daıyndaýda jumsaq plastık paıdalanylsa, kelesi birinde toqyma tehnıkasy qoldanylǵan. Sondaı-aq túrli qosarlanǵan tehnıkalyq tásilder paıdalanylǵandary da bar. Qazaqstannyń qýyrshaqtar álemine 30-dan astam sheber 95 týyndysyn usyndy. Al Reseı tarapynan 19 sheberdiń 55 týyndysy qoıyldy»,-dedi kórmeniń kýratory Oksana Tanskaıa.
Kórmege qatysýshylardyń arasynda: Katerına Kýrochkına, Roza Sársenbaeva, Irına Samoılova, Anastasııa Elıseeva, Marına Kýrmanova, Galına Kleapovskaıa, Irına Itahýnova sııaqty has sheberler men osy ónerge endi ǵana den qoıǵan azamattar bar. Qazaqstan atynan týyndylaryn usynyp otyrǵan sheberler Almaty, Qaskeleń, Kókshetaý, Semeı, Zyrıanovsk, Rıddder sııaqty óńirlerden kelgender.
Merekeniń baǵdarlamasynda álem halyqtarynyń tilderinde qoıylymdar qoıylyp, kórmege kelýshilerdiń nazaryna túrli kontsertter usynylyp, kitaptar men elektrondy oqýlyqtardyń tusaýy kesiledi. Sondaı-aq qýryshaq sheberleri qonaqtarǵa qýyrshaq jasaý ónerin úıretpekshi.
Aıta keteıik, Qazaqstan men Reseıdiń dıplomatııalyq qarym-qatynastarynyń ornaǵanyna 25 jyl tolýyna oraı uıymdastyrylǵan «Máńgige birgemiz» atty kórmeniń ótýine Reseıdiń Almatydaǵy bas konsýldyǵy men QR Á.Qasteev, atyndaǵy Memlekettik óner mýzeıi jáne Qazaqstan qýyrshaqshylar qoǵamdastyǵy muryndyq boldy.
