Almatyda Qazaqstan qolóner sheberlerine arnalǵan marketıng boıynsha trenıngter ótip jatyr
dep habarlaıdy QazAqparat.
Atalmysh shara «Our Heritage» qoǵamdyq qorynyń uıymdastyrýymen jáne «Shevron», GSM-Kazakhstan/KCell kompanııalary men Eýrazııa Ortalyq Azııa qorynyń aqparattyq jáne qarjylyq qoldaýymen ótýde.
Trenıngtiń maqsaty - kásipqoı art-menedjerlerdi daıyndaý arqyly, qolóner sheberleriniń týyndylaryn rynokqa shyǵarý. O.Tansyqbaev atyndaǵy Almaty dekoratıvti-qoldanbaly óner kolledjinde ótip jatqan shara resýrs ortalyqtarynyń ókilderi men kásipkerlerge, óz isiniń kásipqoı sheber mamandaryna arnalǵan. Trenıngti AQSh-tan kelgen qol óner sheberligi boıynsha marketıng salasynyń halyqaralyq eksperti Bet Gotshlıng ótkizýde. Ol Aid to Artisans kommertsııalyq emes uıymynyń táýelsiz keńesshisi. Uıym ár eldiń qolóner sheberlerine kómek kórsetip, ekonomıkasy damyp kele jatqan elderge halyqaralyq rynokqa shyǵýǵa kómek beredi. Bet Gotshlıng Aýǵanstan, Ózbekstan, sonymen qatar Tájikstan qolóner sheberleriniń taýarlaryn rynokqa engizýge, jobalaryn iske asyrýǵa at salysqan ekspertterdiń biri.
Trenıng barysynda dáris alýǵa qatysýshylar marketıng salasy boıynsha halyqaralyq tájirıbemen tanysyp qana qoımaı, qol óner taýarlaryn qalaı ótimdi etýge bolatyn tehnıkalyq joldaryn úırene alady.
Trenıng qańtar aıynyń 16-syna deıin ótedi.
«Qazaqstanda qolóner sheberligin damytý jáne halyqtyq kórkem óner kásibin jańǵyrtý» atty baǵdarlamasy 2006 jyldan beri iske asyp keledi. Osy ýaqytqa deıin elimizde 25 kásibı, 6 bıznes-trenıngter ótken. Eki oqý-ádistemelik qural shyqqan.
