Almatyda Qazaqstan halqynyń birligi doktrınasy týraly halyqaralyq konferentsııa ótip jatyr
ALMATY. Qazannyń 19-y. QazAqparat /Erlik Erjanuly/ - Qazaqstan halqynyń birligi doktrınasyn júzege asyrýda memlekettik tildiń biriktirýshilik faktory qoldanys tappaı otyr. Bul búgin Almatyda ótken "Qazaqstan halqynyń birligi doktrınasy: teorııadan tájirıbege" dep atalatyn halyqaralyq ǵylymı-tájirıbelik konferentsııada aıtyldy.
"Bul sharaǵa doktrınany qabyldaýǵa atsalysqan kóptegen uıymdardyń ókilderi qatysyp otyrǵan joq. Konferentsııa týraly ǵalamtordan oqyp ne ózge de aqparat kózderinen estip ózderi habarlasqan azamattarǵa sharany uıymdastyryp otyrǵan "Alternatıva" ózekti zertteýler ortalyǵynyń basshylary qazaq tilin bilmeıtinin, sondyqtan basqosýdy orys tilinde ǵana ótkizip otyrǵanyn aıtqan. Menińshe bul qazaq jáne orys tildi bop ekige bólinip ketken Qazaqstan qoǵamynyń bet-beınesiniń naqty kórinisi. Aqparat quraldary da áli kúnge deıin tek óz aýdıtorııasymen ǵana jumys jasaýda", - deıdi "Alash úni" qoǵamdyq birlestikter odaǵynyń úılestirýshisi Bolat Náýkenuly.
"Qazaq eli" halyqtyq beıneli entsıklopedııalyq saıtynyń jetekshisiniń aıtýynsha, mundaı sharalar barlyq taraptardyń ókilderi qatysyp bir ústeldiń basynda ózara túsinistik tapqan jaǵdaıda ǵana nátıjeli bolady. Onsyz ótken barlyq talqylaý bos áńgime ǵana bolmaq.
