Almatyda «Qazaqstan ǵarysh sapary» kompanııasy men «Ǵaryshtyq zertteýler men tehnologııalar ulttyq ortalyǵy» jumys tobynyń otyrysy ótti
ALMATY. Shildeniń 30-y. QazAqparat /Erbol Azanbek/ - Keshe Almatyda Qazǵaryshtyń eki iri kásiporny «Qazaqstan ǵarysh sapary» AQ Ulttyq kompanııasy men «Ǵaryshtyq zertteýler men tehnologııalar ulttyq ortalyǵy» AQ-nyń birlesken jobalaryn júzege asyrý jónindegi jumys tobynyń otyrysy ótti.
Bıylǵy jyldyń aqpan aıynda QR Ulttyq ǵarysh agentiginiń tóraǵasy Talǵat Musabaev eki kompanııaǵa birlesip júzege asyrýy tıis birqatar tapsyrmalar bergen bolatyn. Bul jumysty júzege asyrý baǵytynda eki kompanııa basshylary Jumabek Jantaev pen Ǵabdyllatyp Myrzaqulovtyń teń tóraǵalyǵymen jumys toby qurylǵan edi.
Ótken otyrys barysynda Astanada qurylatyn Ulttyq ǵarysh ortalyǵy men ǵaryshty zertteý baǵytyndaǵy jumystar talqylandy. Atap aıtqanda, Qazaqstan aýmaǵyn qashyqtyqtan baqylaý, geodınamıkalyq jáne geofızıkalyq monıtorıng, ǵarysh apparattaryn basqarýdy matematıkalyq baǵdarlamalyq sheshimdermen qamtamasyz etý, qazaqstandyq shıkizattardan ǵarysh jabdyqtaryn jasaý máselesi sóz boldy.
Keńes barysynda qordalanǵan máselelerdi sheshýdiń naqty joldary talqylanyp, Ǵarysh jónindegi keńestiń nazaryna tartý úshin birqatar máseleler anyqtaldy. Basqosý sońynda qatysýshylar Tıan-Shan observatorııasy men «Orbıta» radıo polıgonynyń jumysymen tanysty.
Keńestiń kelesi otyrysy qyrkúıek aıynda ótetin boldy.
