Almatyda Qazaqstan ftızıatorlarynyń VI-shy sezi óz jumysyn bastady

Sezd jumysyna Densaýlyq saqtaý mınıstrliginiń, Qorǵanys mınıstrliginiń, ІІM-niń, Ádilet mınıstrliginiń Qylmystyq atqarý júıesi komıtetiniń ókilderi, , elimizdiń jáne Reseı, Ázirbaıjan, Túrikmenstan, Ózbekstan, Qyrǵyzstan eliniń ftızıatrııa ǴZI-nyń dırektorlary, halyqaralyq uıymdardyń ókilderi, medıtsınalyq ýnıversıtetterdiń rektorlary, ftızıatrııa kafedralarynyń meńgerýshileri qatysýda.

Eki kúnge sozylatyn sezd barysynda elimizben qatar, TMD jáne álemdegi epıdemıologııalyq hal-ahýaldy turaqtandyrý, jaqsartý joldary qaralyp, týberkýlezge qarsy kúres Ulttyq baǵdarlamany júzege asyrýdaǵy túıindi máseleler talqylanyp, sheshý joldary usynylmaq. Sonymen qatar 5 jyl ishinde atqarylǵan jumys nátıjesiniń qorytyndysy shyǵarylmaq.

Esterińizge sala keteıik, sezd bes jylda bir ret ótkizilip turady.

«Sońǵy bes jyl ishinde (2005-2009 jj) týberkýlezdi alǵash juqtyrǵan naýqastar arasynda týberkýlezdiń asqynǵan túrleri 669 jaǵdaıdan 122 jaǵdaıǵa kemidi, týberkýlez menıngıti 46 jaǵdaıdan 18 jaǵdaıǵa kemidi, týberkýlezden ólim kórsetkishi 38 paıyzǵa azaıdy. Jasóspirimder arasynda naýqastaný deńgeıi báseńdedi», - dedi jıyn barysynda QR DSM jaýapty hatshysy Bolat Sadyqov.

Onyń aıtýynsha, týberkýlezge qarsy baǵdarlamanyń aıyryqsha baǵyttarynyń biri kóptegen dárige tózimdi týberkýlezge qarsy kúres bolyp tabylady. «Osy maqsatta barlyq týberkýlezge qarsy mekemelerde týberkýlez dıagnostıkasyn jyldamdatý jáne kóptegen dárige tózimdi týberkýlezdi emdeýdi erterek bastaý maqsatynda zamanaýı zerthanalyq «Bacteg-Mgit- 960» qondyrǵysy keńirek paıdalanyldy. Bıylǵy 2010 jyldan bastap 10 oblysta molekýlıarlyq genotıptik zerthanalyq tásil engizildi. Ahýaldy jaqsartý maqsatynda jańa zamanǵa saı dıagnostıkalyq anyqtaý, emdeý júrgizilip, júıeli monıtorıng jasaldy. Sonymen qatar ınfektsııalyq baqylaý júıesin jetildirýde de úlken is-sharalar júrgizildi. Tıisti salalar men mekeme mamandarynyń biliktiligi arttyryldy. Oblystyq, aımaqtyq, aýdandyq týberkýlezge qarsy dıspanserlerde tósektiń qory qaıta qurylymdaldy», -dedi ol.

Bolat Sadyqovtyń aıtýynsha, qylmystyq atqarý júıesindegi týberkýlezdiń epıdemıologııalyq jaǵdaıynyń kúrdeliligi óz áserin tıgizip, osy saladaǵy týberkýlezben naýqastaný, ólim kórsetkishteriniń ósýine áser etýde. «Osyǵan baılanysty Qaraǵandy jáne Pavlodar oblystaryndaǵy týberkýlezdik mekemelerine «DOTS+» baǵdarlamasynyń pılottyq jobasy engizilýde. Bul shara ońdy nátıjege qol jetkizýge kómekteseri anyq», - dep atap ótti ol.

30 jyl eńbek ótili bar, ShQO-nyń týberkýlezge qarsy dıspanserdiń bas dárigeri, ftızıatr Maıgúl Jigitekovanyń aıtýynsha, V-shi sezden keıin bul qyzmette sapaly ózgeris baıqalǵan. «Ol nátıjeni Elbasynyń jáne memlekettiń jan-jaqty qoldaýynyń arqasynda atqarylǵan aýqymdy sharalardyń jemisi dep bilemin. Búginde bul máseleni sheshýge dárigerlermen birge, jergilikti organdar men halyqaralyq uıymdar belsendi at salysýda. Bul óte qýantarlyq jaǵdaı»,- dep atap ótti ol.