Almatyda «Qazaqstan - bizdiń ortaq úıimiz» atty shyǵarmashylyq etnofestıvaldiń gala-kontserti ótýde
dep habarlaıdy QazAqparat.
Bir aı boıy ótip kelgen etnofestıvaldiń qorytyndy kontsertinde Almaty qalasynyń barlyq JOO-nyń jáne orta arnaýly bilim berý oryndarynyń stýdentteri qatysyp, óz ónerlerin kórsetýde. Olar qazaq tilinde ánnen jáne bıden, óz tilinde óleń aıtý men bı bıleýden baqtaryn synaıdy. Etnofestıvaldiń atalymdary boıynsha eń úzdik án aıtqan oryndaýshyǵa jáne eń úzdik bı ónerin kórsetken qatysýshyǵa arnaıy estelik syılyqtary tabystalatyn bolady. «Festıvaldiń maqsaty - yntymaǵy jarasqan Qazaqstan halqynyń ónerin jalpaq jurtqa, kórermenge pash etýge múmkindik jasaý, ultaralyq dostyqty nyǵaıtý, Qazaqstandaǵy túrli etnos ókilderiniń bir-birine ózderiniń salt-dástúri men mádenıetin tanystyrýyna jaǵdaı týǵyzý bolyp tabylady. Biz osyndaı sharalar arqyly Almaty qalasynyń túrli etnos ókilderi arasyndaǵy baılanysty odan ári nyǵaıta otyryp, barlyq qazaqstandyqtardy memlekettik til - qazaq tili aıasynda toptastyryp, qazaqstandyq patrıotızmdi damytýǵa shaqyramyz», dedi uıymdastyrý komıtetiniń tóraǵasy, Almaty qalasy Jastar saıasaty jónindegi basqarmasynyń bastyǵy Nurbol Baımuhanov.
Atalmysh shara Almaty qalasy Jastar saıasaty jónindegi basqarmasy, «Jastardyń shyǵarmashylyq bastamalaryn qoldaý ortalyǵy» qoǵamdyq qorynyń jáne Almaty qalasy ákimshiliginiń qoldaýymen uıymdastyrylyp otyr.
Kontserttiń ashylý saltanatynda sóz alǵan Qazaqstan halqy Assambleıasynyń múshesi Asyly Osmannyń aıtýynsha, búgingi festıvaldiń máni men mańyzy zor. «Bul shara qoǵamdy biriktirýge, balalardyń elge, jerge, Otanǵa degen súıispenshiligin arttyrady. «Bárimizdiń Otanymyz - Qazaqstan» desek, bul óziniń shyn máninde, ásirese jastarǵa taptyrmaıtyn is-shara. Sonymen qatar, mundaı shara patrıottyq sezimge qalyptastyrady», dep atap ótti A.Osman.
