Almatyda Qazaqstan-Aýǵanstan saýda úıi ashylmaq

ASTANA. QazAqparat – Qazaqstanda aýǵan kásipkerlerimen birlese saýda úıin ashýdy pysyqtaý kerek. Bul týraly Qazaqstan men Aýǵanstan bıznes-forýmynda «Atameken» ulttyq kásipkerler palatasynyń tóraǵasy Raıymbek Batalov málim etti, dep habarlaıdy QazAqparat tilshisi.

«Biz Aýǵanstan óndirýshilermen birlese osyndaı jobany bastap, elimizde Qazaqstan-Aýǵanstan saýda úıin ashýǵa daıynbyz. Bul turǵyda onda aýǵan ónimderiniń turaqty kórme zalyn jabdyqtaýǵa daıynbyz», - dedi R. Batalov.

Osy oraıda bıznes-forýmda atalǵan saýda úıin Almatyda ashý týraly usynys aıtyldy.

Sonymen qatar R.Batalov Qazaqstan Úkimetiniń bastamasymen Qazaqstan Aýǵanstannyń Gerat qalasynda elimizdiń saýda úıi ashylǵanyn eske saldy.

Atalǵan shahardy tańdaý kezdeısoq emes, óıtkeni provıntsııa Iran, Pákistan jáne Túrikmenstanǵa baratyn joldardy baılanystyrý turǵysynan mańyzdy.

«Aldaǵy ýaqytta qarastyrýǵa daıyn turǵan kelesi qadam – birlesken saýda-ónerkásip palatasyn ashý. Qazir bul tájirıbeni birqatar eldermen iske asyryp jatyrmyz», - dedi ol.

Budan buryn habarlanǵandaı, Qazaqstan Aýǵanstan arasyndaǵy taýar aınalymy 3 mlrd AQSh dollaryna jetýi múmkin.

Qazaqstan men Aýǵanstan arasyndaǵy taýar aınalymy 2022 jyly is júzinde 1 mlrd AQSh dollary (987,9 mln. AQSh doll.) belgisine jetip, 2021 jylǵy kórsetkishterden eki ese artty. Taýar aınalymynyń 90% qazaqstandyq eksportqa, negizinen óńdelgen ónimge tıesili. Elder arasyndaǵy saýda bıylǵy 6 aıda 343,6 mln AQSh dollaryn qurady, onyń ishinde Qazaqstan eksporty 334,5 mln dollarǵa jetti.