Almatyda Qazaqstan anımatorlary qaýymdastyǵy prezıdentiniń kórmesi ótedi
ALMATY. 9 sáýir. QazAqparat - Almatyda 12 sáýirde «Belyı roıal» galereıasynda Qazaqstan anımatorlary qaýymdastyǵynyń prezıdenti, Qazaqstan kınogerleri men sýretshiler odaqtarynyń múshesi Ǵalı Myrzashevtyń «Anımatsııa» atty kórmesi ashylady.
Bul shara kezinde sýretshi, qazaq jáne álem anımatsııa óneri tarıhy boıynsha vıktorına ótkizip, jaqsy jaýap bergenderge shyǵarmashylyq týyndylaryn syıǵa tarpaq.
Ǵalı (Sálimǵalı) Qasymhanuly Myrzashevtyń óner áleminde ózindik qoltańbasy bar. Ol buǵan deıin búkilodaqtyq, halyqaralyq jáne respýblıkalyq kórmelerde jurtshylyq nazaryna óz shyǵarmalaryn usynyp, ónersúıer qaýymnyń ystyq iltıpatyna bólengen edi. Atap aıtqanda, sońǵy onjyldyqtyń ishinde 2005 jyly Nıý-Iorktaǵy 402 jáne 2/20 galereıalar mýzeıinde derbes kórmeleri ótti. Sondaı-aq 2005 jyly Nıý-Iorktegi Korg galereıasyndaǵy «Sýretshi úni» ujymdyq kórmesinde, 2007 jyly Londondaǵy Qazaqstan sýretshileri kórmesinde, 2008 jyly Manhettendegi 235-galereıadaǵy jáne Almatydaǵy Ábilhan Qasteev murajaıyndaǵy halyqaralyq kórmelerge qatysty.
