Almatyda Qazaqstan áleýmettanýshylarynyń IV kongresi ótip jatyr

Sharaǵa óz elimizben qatar, Ýkraına, Belarýs, Qyrǵyzstan elderiniń áleýmettanýshylary, QR Prezıdenti Ákimshiliginiń, QR Mádenıet mınıstrligi men QR Bilim jáne ǵylym mınıstrliginiń, qala ákimdiginiń, sonymen qatar Almaty men Astana qalalarynan kelgen JOO-nyń ókilderi qatysýda. Aımaqtardan kelgen qatysýshylardyń sanymen qosqanda kongreske 120 adam qatysýda.

Qazaqstan áleýmettanýshylary qaýymdastyǵynyń prezıdenti, áleýmettaný ǵylymdarynyń doktory, professor Marat Tájınniń aıtýynsha, kongress el táýelsizdigi 20 jyldyǵyna daıyndyq aıasynda, QR Mádenıet mınıstrligi men QR Bilim jáne ǵylym mınıstrliginiń qoldaýymen ótkizilýde.

«Qazirgi tańda Qazaqstanda óte joǵarǵy deńgeıde áleýmettik zertteýler júrgizilýde, boljamdar da naqty jasalynýda. Sońǵy segiz jylda áleýmettik zertteýlerge qatysýshylardyń sany eki esege artty, saýalnamalarǵa senim 50 paıyzdan 70 paıyzǵa deıin ósti. Qazaqstandyqtardyń 2/3 zertteýlerdi paıdaly dep sanaıdy»,-dedi Marat Tájın.

Búgin kongreske qatysýshylar áleýmettik jańarýdyń ózekti máselelerin, qoǵamnyń áleýmettik jańarýyndaǵy tilderdi damytý baǵdarlamasyn, JOO-nyń rólin, Qazaqstandaǵy eńbek mıgratsııasy, Qoǵamnyń jańǵyrý turǵysyndaǵy qazaqstandyqtardyń áleýmettik kóńil-kúıleri syndy osy jáne ózge de suraqtardy talqylaýda.

Búgin shara sońynda "Qazaqstandyq áleýmettanýdaǵy tanymal tulǵalar" atty tolyqtyrylǵan ekinshi kitaptyń tanystyrylymy ótedi.

Shara qorytyndysy áleýmettanýshylar qaýymdastyǵynyń «Áleýmettaný-Sociology» atty jýrnalynyń arnaıy sanynda jaryq kóretin bolady.

Erteń, kongrestiń ekinshi kúni elimizde tuńǵysh ret Qazaqstan jas áleýmettanýshylarynyń Birinshi forýmy ótedi.