Almatyda "Kazakhstan Art Week" qazaqstandyq óner aptalyǵy ashyldy
ALMATY. 25 mamyr. QazAqparat /Názıra Eleýhan/ - Búgin Almatydaǵy Ortalyq kórme zalynda "Kazakhstan Art Week" qazaqstandyq óner aptalyǵynyń resmı ashylýy bolyp ótti.
Kórkem kórme jáne aýktsıondar dırektsııasynyń uıymdastyrýymen ótkizilip jatqan sharaǵa óz elimizben qatar, shet eldiń óner sheberleri, áýesqoı sýretshiler men kásipqoı sýretshileri qatysýda.
Aptalyq baǵdarlamasy boıynsha ónerdiń 5 túrinen - keskindemeden, grafıka, fotosýret, músindeme, qoldanbaly óner túrinen halyqaralyq baıqaýlar ótkizileten bolady. Ádilqazylar quramyna art-ındýstrııanyń qazaqstandyq jáne sheteldik tanymal ókilderi kirgen. Qatysýshylar óz jumystaryn bir ýaqytta baıqaýǵa jáne kórme baǵdarlamasyna usynatyn bolady. Jeńimpazdar arnaıy sertıfıkattarmen marapattalady.
"Óner aptalyǵy bıyl osymen ekinshi ret ótkizilip otyr. Kórmege baıqaýǵa qatysýshylardyń 100-den asa týyndylary qoıyldy, ishinde fotosýret, kórkem sýretten bastap, gobelen, qyshtan jáne taǵy da basqa ár túrli zattardan jasalynǵan buıymdary qoıylǵan. Sharanyń maqsaty - ár túrli deńgeıdegi sýretshiler men óner sheberlerin biriktirý, jańa tulǵalardy tabý, olarǵa jol ashý, óner adamdaryn yntalandyrý, shyǵarmashylyqtarynyń ilgerileýine yqpal etý bolyp tabylady. Bul bir ózinshe prodıýsserlik joba",-dedi jobanyń prodıýsseri Marına Vasıleva. Onyń aıtýynsha, baıqaý barysynda kóptegen sheberlik synyptar, dárister, sonymen qatar, shyǵarmashylyq kezdesýler ótedi.
Óner aptalyǵyna qatysýshylardyń barlyq jumystary óner saıtyna qoıylyp, Eýropanyń birneshe tilinde jaryq kóretin "Ónerdegi jańa tulǵalar" atty halyqaralyq basylymda jarııalanatyn bolady. Basylym Eýropa men Amerıka elderindegi galereıalar men halyqaralyq kórmelerde jáne festıvalderde taratylatyn jýrnal.
Kórme 2 shildege deıin jalǵasady.
