Almatyda «Qazaqfılmniń» júldeli kınohıtteri kórsetiledi

13 aqpanda kórermender Ábish Kekilbaevtyń povesi jelisi negizinde rejısser Jańabek Jetirýov túsirgen «Shyńyraý» fılmin kórsetedi. Fılmde Eńsep esimdi keıipkerdiń qudyq qazý týraly oqıǵasy baıandalyp, baqtalastyq, maqtanysh, mahabbat, dostyq, satqyndyq syndy ómir oqıǵalary baıandalady.

Ótken jyldyń basynda Dakkada (Bangladesh) ótken 17-shi Halyqaralyq kınofestıvalde kınorejısser Rıvkat Ibragımovtyń bul fılmdegi jumysy Azııa kınofestıvalinde úzdik dep tanyldy. Sonymen qatar, Jetirýovtyń atalmysh kartınasy «Fadjr» halyqaralyq kınofestıvaline (Iran), 28-shi «Altyn qoraz ben jeti tús» kınofestıvaline (Qytaı), AQSh-ta ótken Asian International Film Festival Arizona festıvaline, Jaıpýrda (Úndistan) ótken 2-shi Kaarıat halyqaralyq kınofestıvaline qatysqan.

14 aqpanda kórermenge Azız Zaırov pen Muhamed Mamyrbekov atty rejısserlerdiń birlese túsirgen «Qyz ben teńiz» áleýmettik dramasy usynylady. Kartına tserebraldy sal aýrýy dıagnozymen ómir súretin Ásel esimdi qyzdyń kúrdeli taǵdyry, onyń armandary, mahabbat jáne otbasy týraly baıan etedi.

Búgingi tańda fılm birneshe halyqaralyq kınofestıvalderge qatysyp úlgergen. Fılm kelesi marapattarǵa ıe boldy: «Úzdik aktrısa úshin» syılyǵy (Dınara Sháripova), Romford kınofestıvali (London, Ulybrıtanııa), qoǵam qaıratkeri Karıne Habırovanyń «Áleýmettik jáne motıvatsııalyq kıno» nomınatsııasyndaǵy arnaıy syılyǵy jáne Bashqurtstan Respýblıkasy Otbasy jáne eńbek mınıstrliginiń «Armandy júzege asyrǵany úshin» arnaıy syılyǵy (akter Tahır Ýmarov), IV Halyqaralyq «Kúmis Aqbýzat» kınofestıvali (Ýfa, Reseı), «Barselona» Azııalyq kınofestıvaliniń «Panorama» bólimindegi «Úzdik fılm» syılyǵy (Barselona, Ispanııa).

15 aqpanda almatylyqtar 41-shi Máskeý halyqaralyq kınofestıvalinde qazaqstandyq kıno tarıhynda tuńǵysh ret Gran-prı jeńip alǵan Farhat Sháripovtyń «Jeke jetilý trenıngi» fılmin kóre alady. Sondaı-aq, kartına XV «Eýrazııa» halyqaralyq kınofestıvalinde Gran-prıge ıe bolǵan.

Fılmniń álemdik tanystyrylymy 2018 jyly 23-shi Býsan halyqaralyq kınofestıvalinde «Azııa kınoteatryndaǵy tereze» konkýrstyq baǵdarlamasynda ótti. Sol jyly fılm Almatyda ótken 14-shi Sháken Aımanov atyndaǵy halyqaralyq kınofestıvalde týyndy qazylar alqasynyń arnaıy syılyǵy men NETPAC syılyǵyn ıelendi.

«Jeke jetilý trenıngi» fılmi 40 jastaǵy bank qyzmetkeri Qanat orta jastaǵy ómirlik daǵdarysty bastan keshirý oqıǵasyn kórsetip, onyń uzaq ýaqyt boıy eshteńe armandap kórmegeni jáne ómirden eshteńe kútpeıtinin baıandaıdy. Ózin jáne kózqarasyn ózgertý áreketi kezinde basty keıipker ózin-ózi damytý jattyǵýlaryn baryp, munda áıgili jattyqtyrýshy kóshbasshylyq pen sáttilik qupııalaryn bólisedi. Alaıda. burynnan tanys Danııardy kezdestirgende, Qanattyń taǵdyry kenetten ózgeredi.

Kórermen osy kúnderi «Qazaqfılm» kınostýdııasynyń basqa da fılmderin tamashalaı alady.

16 aqpanda Emır Baıǵazınniń «Ózen» kartınasy trılogııasynyń úshinshi, ıaǵnı qorytyndy bólimi kórsetiledi. Fılm órkenıetten ada qalǵan aǵaıyndar týraly, olardyń qalaǵa kelgennen keıingi ómirlik ózgeristerin pash etedi.

«Ózen» fılminiń álemdik premerasy 75-shi Venetsııalyq kınofestıvaldiń «Kókjıekter» baǵdarlamasynda bolyp, Emır Baıǵazın «Úzdik rejısser» syılyǵymen marapattaldy. Soltústikamerıkalyq premera Torontodaǵy halyqaralyq festıvalde ótken edi. Kartına sonymen qatar «Platforma» konkýrstyq baǵdarlamasyna usynylyp, tóreshilerdiń nazaryna ilinip qana qoımaı, Screen Daily reıtınginde birinshi orynǵa ıe boldy. Arada bir aı ótkennen keıin «Ózen» 12-shi «Asia Pacific Screen Awards» keshinde «Rejıssýra jetistigi» nomınatsııasyna ilindi. «Ózenniń» azııalyq tanystyrylymy Tokıo kınofestıvalinde boldy. Los-Anjelestegi «Asian World Film Festival»-da «Ózen» tóreshilerdiń syılyǵyn ıemdendi. Sonymen qatar, Emır Baıǵazınniń kartınasy Portýgalııadaǵy LEFFEST kınofestıvalinde bas júldeni enshiledi.