Almatyda qazaq-japon onkodıagnostıkalyq ortalyǵy salynady
Qalalyq ákimdiktiń habarlaýynsha, atalǵan dıagnostıkalyq ortalyq Ortalyq Azııa boıynsha ashylǵaly otyrǵan japon medıtsınasynyń tuńǵysh mekemesi bolmaq. Onyń ereksheligi - onkologııalyq aýrýlardy erte satyda anyqtaı alý múmkindigi.
«Yntymaqtastyq memorandýmy aıasynda qazaq-japon onkologııalyq ortalyǵy eń ozyq tehnologııalarmen jabdyqtalady. Jobanyń basty sharty - jergilikti mamandardyń kásibı biliktiligin arttyrý», - delingen habarlamada.
«Biz qazirgi kezde japon kompanııalaryn, olardyń ınvestıtsııalary men tehnologııalaryn tartyp jatyrmyz. Óıtkeni, olar kóptegen salada aldyńǵy qatarda. Tipti, keıbireýiniń álemde balamasy da joq. Ortalyqta almatylyqtar men óńir turǵyndaryna sapaly ári qoljetimdi qyzmet kórsetilýi mańyzdy», - dedi qala basshysy.
Shýzo ıAmamoto japon medıtsınasynyń jetistigin eksporttaý máselesinde Ortalyq Azııa boıynsha Almaty qalasy tańdap alynǵanyn atap ótti.
«Japonııada emdelmes buryn, jyl saıyn dıagnostıkadan ótý mańyzdy.Osy pikirimizge Almaty halqy da túsinistikpen qaraıdy dep senemiz. Ortalyqtyń tujyrymdamasyn ázirleý úshin Almaty turǵyndarynyń syrqattaryna qatysty statıstıkalyq saraptama júrgizemiz. Japon medıtsınasyn eksporttaýda Almaty jaıly ári tıimdi oryn retinde tańdaldy», - dedi «Medical Excellence Japan» kompanııasynyń prezıdenti Shýzo ıAmamoto.
Jalpy úsh jyl ishinde qalada birqatar iri medıtsınalyq nysan salý josparlanǵan, olardyń ishinde jańa onkologııalyq ortalyq, perzenthana jáne «Mount Sinai» halyqaralyq gospıtali bar.
Aıta keterligi, sońǵy 2 jyl ishinde megapolıste medıtsına mekemelerin jaraqtandyrý deńgeıi 75%-ǵa jetti. Qalalyq densaýlyq saqtaý júıesin tsıfrlandyrý barysynda ár patsıenttiń elektrondy densaýlyq pasportyn engizý, kem degende 35 jyljymaly modýldi keshen arqasynda ortalyqtandyrýdy iske asyrý jáne Smart tehnologııany paıdalanyp medıtsınalyq kómek sapasyn arttyrý josparlanǵan.
