Almatyda «Qazaq ultynan - qazaq eline» atty konferentsııa ótti
ALMATY. 24 jeltoqsan. QazAqparat /Ádilet Musahaev/ - Biz táýelsizdik alǵan tusta «Qazaq eli» dep atalǵanymyzda búgingi kúni kóp nárse túsinikti bolar edi.
Búgin Parlament Senatynyń depýtaty, UǴA-nyń akademıgi, fılosofııa ǵylymdarynyń doktory, professor Ǵarıfolla Esim Almatydaǵy ál-Farabı atyndaǵy QazUÝ-de ótken «Qazaq ultynan - qazaq eline» atty konferentsııa barysynda osyndaı pikir bildirdi.
Ǵ.Esim Keńes úkimeti tusynda elimiz Qazaq KSRO-sy dep atalǵandyǵyn jáne onyń bir jaǵymdy, bir jaǵymsyz jaǵy bar ekendigin aıtady. «Birinshiden, KSRO degen alpaýyt eldiń quramynda ekenimizdi bildirse, Qazaq degen ataý «qazaq» ultynyń bar ekendigin bildiretin. Biz táýelsizdik alǵan tusta osy qazaq degen ataýdy saqtap qalyp, «Qazaq eli» dep atalǵanymyz jaqsy bolar edi», -deıdi professor.
Onyń aıtýynsha, biz Keńes úkimeti tusynda sotsıalıstik ult bolyp qalyptasyp, ósip, órkendep, 1991 jyly óz táýelsizdigimizdi jarııalaı otyryp, halyqaralyq sýbektige aınaldyq, odan elge aınaldyq. «Sóıtip biz Qazaq elin quryp, jumys isteýdemiz. Byltyr Prezıdentimiz «Qazaq eli» degen monýment te ornatty. Qazir biz qazaq ultynyń emes, qazaq eliniń Prezıdenti dep ataımyz. Endi qazaq ultynyń máselesiniń bári qazaq eliniń máselesine aınaldy. Buryn qazaq tili qazaq ultynyń tili bolyp kelse, endigi kezekte Qazaq eliniń tiline aınaldy. Sondyqtan qazaq tilin bilý elimizdegi barlyq azamattarǵa ortaq», - dep atap ótti óz sózinde Ǵarıfolla Esim.
Sondaı-aq ol elimizdegi ár ulttyń mádenı oshaqtaryna baılanysty sóz qozǵaǵanda durys sóıleý kerektigin aıtyp ótti. «Memleketimizde turatyn basqa ulttardy etnos retinde qaraǵan jón. Óıtkeni olar bul eldiń túpkilikti ulty emes. Eger biz olardy ulttyq dep moıyndasaq, olardyń jeri, mádenıeti bolýlary kerek jáne taǵy basqa parametrlerge jaýap beredi. Sondyqtan olardyń mádenı oshaqtaryn etnomádenı ortalyǵy dep ataýdy jón kórdik», - deıdi professor.
Konferentsııa barysynda Ǵarıfolla Esim, Aqtolqyn Qulsarıeva, Gúlmıra Sultanbaeva birlesip shyǵarǵan «Qazaq ultynan - qazaq eline» kitabynyń tanystyrylymy boldy.
Atalǵan shara ál-Farabı atyndaǵy Qazaq Ulttyq ýnıversıteti, fılosofııa jáne saıasattaný fakýltetiniń uıymdastyrýymen ótti.
