Almatyda qazaq tilinen erekshe sabaq ótti
ALMATY. 13 sáýir. QazAqparat /Ádilet Musahaev/ - Almatydaǵy Qazaq menedjment, ekonomıka jáne boljaý ınstıtýtynda sheteldik oqytýshylardyń qatysýymen qazaq tilinen erekshe sabaq ótti.
Sabaq barysynda sheteldik qonaqtar stýdentter men barlyq qatysýshylarǵa memlekettik tildi qalaı meńgerýge bolatyndyǵy jaıynda áńgimeledi. Qazaq tili spıkerlerdiń eshqaısysynyń ana tili emes, degenmen olar qysqa merzim aralyǵynda qazaqsha túsinip qana qoımaı sóıleýdi de úırenip alǵan.
Amerıkanyń Florıda shtatynan kelgen oqytýshy Djonatan Rıdel 2009 jyly Qazaqstanǵa álemdik korpýstyń eriktisi retinde kelgen. Kelgeli ol aǵylshyn tiliniń oqytýshysy qyzmetin atqaryp, Túrkistan mańyndaǵy Sháýildir aýylynda áleýmettik erikti retinde jumys istegen. Vırdjınııa shtatynyń Rıchmond qalasynan kelgen Hollı Maıer atty taǵy bir spıker ótken jyly Bishkekte úsh aı bolǵandyǵyn aıtady. Qyrǵyz tili men ádebıetin London mektebinde júrgende úırene bastaǵan ol qyrkúıekten beri ACTR/ACCELS baǵdarlamasy aıasynda QMEBI-da qazaq tilin meńgerýde.
«Aqpan aıynan beri oqytýshylardan qazaq ádebıetinen sabaq alýdamyn. Men qazaq jáne qyrǵyz tilderin úırenip, olardyń ádebıetteriniń qaǵıdalaryn tereń túsingim keledi. Vırdjınııa ýnıversıtetinde keńestik ádebıetti oqý barysynda osy aımaqtardyń ádebıetine degen qyzyǵýshylyqty Shyńǵys Aıtmatov pen Oljas Súleımenovtyń eńbekteri oıatty», -deıdi H.Maıer.
