Almatyda «Qazaq tili: is qaǵazdaryn júrgizý» atty oqý quralynyń tusaýkeser rásimi ótti
ALMATY. 11 sáýir. QazAqparat /Ádilet Musahaev/ - Búgin Almatyda QR Mádenıet mınıstrligi Til komıtetiniń tapsyrysy boıynsha ázirlengen «Qazaq tili: is qaǵazdaryn júrgizý» atty oqý quraly men «Oryssha-qazaqsha isqaǵaz úlgileri» elektrondy baǵdarlamasynyń tusaýkeseri ótti.
Atalǵan oqýlyqtyń avtory fılologııa ǵylymynyń doktory, professor Lázzat Dúısembekova oqý quraly qazaq resmı is-qaǵazdar tilin oqytý, zertteý barysyndaǵy izdenisterden týyndaǵan oı-pikirler men jınaqtalǵan materıaldar negizinde jazylǵandyǵyn alǵa tartady.
Lázzat Dúısembekova oqýlyq til úırenýshilerdiń ekinshi deńgeıine arnalǵandyǵyn aıtady. «Jalpy, 1999 jyldan beri JOO-da is-qaǵazdaryn qazaqsha júrgizý degen pán júrgizilip jatyr. Sol kezde alǵashqy oqý quraly shyqqan bolatyn, degenmen qolymyzda teorııalyq jáne tájirıbelik quraldar bolmaǵandyqtan ol kitaptyń kemshin tustary boldy. Al osy kitapta tájirıbedegi usynystar, oqytýshylardyń, til ortalyqtaryndaǵy úırenýshilerdiń jáne ózimizdiń stýdentterdiń eskertpeleri eskerilip, birneshe jyldardaǵy eńbektiń jemisi desem bolady. Kitaptyń basty ereksheligi - ýaqytty únemdeý, muǵalimniń jumysyn jeńildetý, stýdentpen kóp jumys isteýge múmkindik týdyrý. Negizgi maqsat - resmı stıldi, sonyń tilin jáne is qaǵazdarynyń túrlerin jazdyrýdy meńgertý», -deıdi avtor.
Professordyń aıtýynsha, «Qazaq tili: is qaǵazdaryn júrgizý» atty oqý quraly memlekettik tildi úıretý kýrstarynda, aýdarmashylardyń, is qaǵazdaryn júrgizýshilerdiń biliktiligin arttyrý kýrstaryna, joǵary jáne arnaıy oqý oryndaryna negizdelgen.
Oqý quralyndaǵy ár paragraf is qaǵaz túri týraly túsindirme mátinnen, úlgiden, 15 tapsyrmadan jáne taqyrypqa qatysty 20 suraqtan quralǵan testten turady. Sonymen qatar óz betimen oqýǵa arnalǵan tapsyrmalar, referat jazý úshin daıyndalǵan materıaldar men is qaǵazdaryn júrgizýshige qajetti taqyryptyq sózdikter berilgen.
Sharaǵa Almaty qalasy joǵary jáne arnaıy orta oqý orny til kafedralarynyń oqytýshylary, til ortalyqtarynyń qyzmetkerleri, is qaǵazdaryn júrgizý jáne aýdarma máselelerimen aınalysatyn mamandar qatysty.
