Almatyda qazaq kúresinen «Halyq barysy» respýblıkalyq týrnıri ótedi
«Qazaqstan barysy» qazaq kúresin damytý qorynyń baspasóz qyzmeti habarlaǵandaı, atalǵan týrnırdiń júlde qory - 20 mıllıon teńge. Týrnırge elimizdiń barlyq óńirinen 1000-ǵa jýyq balýan qatysady dep kútilýde.
Búgin Almatyda osy jarysqa baılanysty baspasóz otyrysy ótti. Oǵan Almaty qalasy sport basqarmasy basshysynyń orynbasary Erkebulan Kenjebolatov, QR qazaq kúresi federatsııasynyń bas hatshysy Baqdáýlet Sábıtov, «Qazaqstan barysy» qazaq kúresin damytý qorynyń atqarýshy dırektory Janarbek Atyǵaev jáne І «Halyq barysy» Maqsat Qıqymov qatysty.
Ekinshi ret ótkeli otyrǵan týrnır «Rýhanı jańǵyrý» maqalasyn iske asyrý maqsatynda umyt qalǵan kóne balýandyq ónerimiz - «beldesý» sport túrin qaıta jańǵyrtý, jastardy sportqa tartý, qazaq halqynyń ulttyq sport túrlerin nasıhattap, sporttyq salt-dástúrin saqtaýǵa jumyldyrýdy kózdeıdi.
«Bıylǵy týrnırdiń basty ereksheligi - kórermender arasynda avtokólik oınatylady. Sondaı-aq, jattyqtyrýshylarǵa arnaıy syıaqy taǵaıyndalyp otyr. Jarysqa 18 ben 50 jas aralyǵyndaǵy salmaǵy 70 keliden asatyn Qazaqstan Respýblıkasynyń kez kelgen azamaty qatysa alady», - dep atap ótti federatsııanyń bas hatshysy B.Sábıtov.
Sondaı-aq, qatysýshylarǵa qoıylatyn talaptarmen tanystyrdy. Spıker aıtyp ótkendeı, jarys barysy Qazaq kúresi federatsııasy bekitken erejelerge sáıkes jáne olımpıadalyq júıe boıynsha ótkiziledi. Balýandar kúresi negizgi «jeńdi», «jeńildi» jáne «teń tústi» degen úsh nátıjemen baǵalanady.
Týrnır «Suńqar» halyqaralyq shańǵy tramplınder kesheninde ótedi. Jarystyń bastalýy - 25 mamyr, saǵat 11.00-de. Al qatysýshylardy tirkeý rásimi 23-24 mamyr kúnderi saǵat 10.00.-21.00 aralyǵynda júrgiziledi.
Halyq arasynan shyǵatyn barysty anyqtaý sharasyn QR Mádenıet jáne sport mınıstrligi, QR qazaq kúresi federatsııasy jáne «Qazaqstan barysy» qazaq kúresin damytý qory Almaty qalasy ákimdiginiń qoldaýymen uıymdastyryp otyr.
