Almatyda qazaq kúresimen aınalysatyndar sany jyl saıyn eselep artýda
ALMATY. QazAqparat - Almaty qalasynda «Qazaqstan barysy» respýblıkalyq týrnıriniń irikteý saıystaryna qatysatyndar sany jylyna eki eseden artýda. Bul týraly búgin Almatyda qazaq kúresinen ótip jatqan týrnırde Almaty qalasy boıynsha qazaq kúresiniń aǵa bapkeri Ermek Nasıev málimdedi.
Onyń aıtýynsha, qazaq kúresi almatylyqtar arasynda tanymal sport túrine aınalýda. «Qazaqstan barysy» ótken alǵashqy jyly irikteý jarysynda búkil Almaty qalasy boıynsha bary-joǵy 32 palýan ózara baq synasqan edi. Ekinshi jyly osyndaı irikteý saıystaryna ár aýdannyń ózinen 12-16 palýannan shyqty. Al bıylǵy jylǵa keletin bolsa, árbir aýdandyq irikteý saıystaryna 25-30 palýannan qatysty. Qyzyǵýshylyq óte joǵary», - dedi Ermek Nasıev. Jalpy elimiz boıynsha qazaq kúresimen búgingi tańda 35 myńnan astam adam aınalysady eken. Aıta keteıik, búgingi týrnırge aýdandyq jarystarda top jarǵan14 palýan qatysýda. Al QR Prezıdenti Nursultan Nazarbaevtyń júldesi boıynsha qazaq kúresinen «Qazaqstan barysy» respýblıkalyq tórtinshi týrnıriniń aqtyq kezdesýleri aldaǵy maýsym aıynyń 29 juldyzynda Astana qalasynda ótedi.
