Almatyda qazaq kınosynyń klassıgi Májıt Begalın týraly jańa derekti fılm dúnıege keldi
MATY. 31 qazan. QazAqparat /Názıra Eleýhan/ - Búgin Almatyda Kıno úıinde qazaq kınosynyń klassıgi, kınorejısser Májıt Begalın jaıynda túsirilgen "Kogda dýshı ne mojet molchat" dep atalatyn derekti fılmniń tanystyrylymy bolyp ótti.
Derekti fılmniń rejısseri Bolat Núsipbekov. Stsenarıı avtory - Núrgúl Túsipbekova. Fılmniń keńesshisi - Qasym Begalın. Fılm - 52 mınýttyq.
Derekti fılmde qazaq kınosynyń úsh alyptarynyń biri Májıt Begalınniń ómiri, kınodaǵy qyzmeti, dúnıege ákelgen fılmderiniń tarıhy baıandalady. Onda sonymen qatar, rejısserdiń kezinde shyǵarýǵa tyıym salǵan, uzaq ýaqyt boıy sórede jatyp qalǵan "Otqa oranǵan Oral" fılminiń taǵdyry jaıynda aıtylady.
"Fılmdi túsirýde qıyndyqtar boldy, óıtkeni, ol kisini biletin adamdar o dúnıelik bolyp ketti, al, derekti fılm tek naqty faktilerge súıene otyryp, ony biletin adamdar arqyly, shyndyqty kórsete otyra jasalýy qajet. Sondyqtan bizge kóbine muraǵat qujattaryn paıdalanýǵa týra keldi. Fılmdi jasaý barysynda Májıt Begalın kadrde sóılep turǵan bir-aq lentany Máskeý muraǵatynan áreń taptyq. "Ótkensiz bolashaq joq" demekshi, ondaı tulǵa jaıynda ár jıyrma jyl saıyn jańa derekti fılm túsirilip turý kerek"-dedi fılmniń rejısseri B.Núsipbekov.
Onyń aıtýynsha fılmdi daıyndaý jyldyń basynda bastalǵan.
Tanystyrylym barysynda bul derekti fılm sońǵy 10 jylda túsirilgen eń úzdik týyndy dep atap ótildi.
Alǵashqy kórermender retinde derekti fılmniń premerasyna qazaq kıno ardagerleri men qaıratkerleri shaqyryldy.
Sh.Aımanov atyndaǵy "Qazaqfılm" kınostýdııasynyń bas redaktory Dıdar Amantaıdyń aıtýynsha, atalmysh fılmniń resmı túrdegi premerasy 2012 jyly aqpan aıynda ótedi.
