Almatyda qazaq kınoshejiresiniń sheberi V.Belıalovqa arnalǵan kórme ótti
ASTANA. QazAqparat - «Qazaqfılm» kınostýdııasynan shyqqan kóptegen derekti fılmderdiń avtory, belgili kınooperator, Memlekettik syılyqtyń ıegeri Vıacheslav Belıalovqa arnalǵan kórme ótti, dep habarlaıdy «Habar» telearnasy.
Qazaq kıno ónerine aıtýly eńbek sińirgen Vıacheslav Belıalovtyń kózi tiri bolǵanda 80 jasqa tolar edi. Júrgenov atyndaǵy Ulttyq óner akademııasynda ótken kórmede onyń tabıǵattyń tylsym syryn ekran arqyly kórsete bilgen sheberligi aıshyqtaldy.
Ózi alpınızmmen aınalysyp, taý shyńyna kóterilgende de ónerdegi aınymas serigi bolǵan kınokamerasyn qolynan tastamaǵan. Aptalap, tipti aılap dalada, shatyrda jatyp, sırek kezdesetin ań-qustardy taspaǵa túsirgen qundy kórinisteri ondaǵan derekti fılmge arqaý boldy.
Kórmege kóptegen óner baıqaýlaryna qatysyp, jeńimpaz bolǵan onyń dıplomdary men marapattaýlary qoıyldy. Dostary men jaqyndary, áriptesteri eske alyp, qyzyqty áńgimelerin ortaǵa saldy.
